Dîlan Babat

 

HATAY - Hemsereka SYKPyî Canan Yuceye da zanayîş ke polîtîkayê globalkerdişî yê îqtîdarî do Hatay de veng bivejê û vat ke badê erdlerzî bêkoordînasyonbîyayîş dewam kerd û şar şero ke yeno rayraberdiş vera nêeşkeno şînê xo bigîro.

 

Erdlerzo ke merkezê ci Mereş bî ra dima bilançoyêk gird vejîya raşte û yew bajaro ke tewr zêde erdlerzî ra tesir bî Hatay bî. Hemsereka Partîya Newe ra Sosyalîst (SYKP) Canan Yuceya ke roja yewine ra nata Hatay de hetkarîya şarî kena û seba donemê awankerdişî têkoşîn dana, derheqê erdlerzî de ercnayîşan kerd.

 

‘Cigêrayîş û xelisnayîş qels bî’

 

Canane dîyar kerd ke yew aşme erdlerzî sero ra derbaz bî û çîyê ke roja yewine de ameyî vatiş reyna vana û wina dewam kerd: “Xebata xelisnayîşî qels bî. Bi hezaran kesî bêîhmalî vera dinyaya xo bedilnayî. Tu îqazêk derheqê awanîyan de nêame kerdiş û tedbir nêame girewtiş. Badê erdlerzî her çî vejîya raşte. Bêkoordînasyonî estbî. Tîya de ne walî ne şaredar û ne zî AFAD estbî. Ez roja diyîne ra nata tîya de ya. Şar vatêne ‘dewlete çin a, AFAD çin o, ekîbê xelisnayîşî çin o’. Roja çarine de ekîbê ke ameyî qels bî. Ma zanê ke roja hirîne krîtîk a. Ekîbê xelisnayîşî roja hirîne de dest bi xebatan kerd.”

 

‘Şar nêeşkeno şînê xo bigîro’

 

Canane da zanayîş ke şar nasnameyê xo vera zî rastê cîyayî ameyî û wina domna: “Çi heyfo ke ma nê hîssî raşteyan de bo xo ciwîyayî. Ma şîyêne kam ci taxe hewarî estbî. Xeylê vînîbîyayeyî estbî. Xeylê kesî mezelanê bêkesan de ameyî definkerdiş. Xeylê kesî zî hema zî nêameyî dîyîş. Şarê tîya têkoşînê cuye vera nêeşka şînê xo bigîro. Ma hema zî înan reyde meşgul benê. Yew aşme derbaz bî hema zî problemê konan çareser nêbîyo. Roja 10-15ine de konî ameyî. La mumkun nîyo ke ma nê çîyî bîyarê ca. Xeylê konê ke yenê zî AFAD dest roneno ser. Ma nêzanê berê kam ca zî. Hedefê ma no yo ke şar hetê starbîyayîş û weşîye de baş bibo. Zafaneyê konê ke yenê dayîş ne goreyê şertanê hamnanî yî ne zî goreyê şertanê zimistanî yê. Tutê ke şîyêne sinifê yewine wendiş û nuştişî xo vîra kerdî. Ganî bi lez hetê perwerdeyî, weşî û cinîyan de tedbîrî bêrî girewtiş.”

 

‘Zaf zêde şîdet esto’

 

Canane qiseykerdişê xo wina qedênaye: “Ganî hetê tarîxî yê bajarî nêro xeripnayîş û newe ra bêro viraştiş. Hatay cayêk zaf kulturî yo. Ganî goreyê tarîxê ci bêro awankerdiş. Ganî tîya de bi şeklo ke her kes reyna pîya biciwîyo cuye bêra awankerdiş. Ma hukmatî îqaz kenê. Ganî şeklê tarîxî yê Hatayî nêro xeripnayîş. Ma vat ke dewlete çin a la dewlete OHALî îlan kerd. Dima ra zî raşteyan bi leşkeran pir kerd. Xeylê hedîseyê şîdetî ameyî ciwîyayîş. Kam ame vernîya înan şîdet pê ardî. Xeylê rojnameger, rêxistinê komelo sivîl û partîyê sîyasî raşteyan de yê. Badê demêk ganî raporê zaf hetin bêro hadrekerdiş. Ma hema newe dest pêkerd. Ma seba awankerdişê Antakya, Îskenderun, Samandag û Arsuzî vengê awankerdişî dane her kesî. Bê şik na paştîdayîş seba heme herêma erdlerzî vîyarena. Ganî ma polîtîkaya îqtîdarî ya cîyakarî zî teşhir bikerê. Ganî sîyasetê globalkerdişî bêro teşhîrkerdiş.”