Nîşmîye Guler

 

MEREŞ - Dewa Aşagi Kuyumcularî ke merkezê erdlerzî ra yew bî, awanîyêk daxî nêmendo û hemwelatijî seba awankerdişê komelêk newe bi hêzê xoserî xo rayra benê û cuyêka komunale awan kenê.

 

Badê di erdlerzê girdî ke merkezê înan Mereş bî de qewimîya, vejîya raşte ke rayîrberê herêmî û xorayraberdişê şarî çend muhîm o. Şaro ke terkê mergî ame kerdiş bi vatişê ‘dewlete çin a, dewlete kam ce de ya’ reaksîyonê xo mojna. 

 

Kurdê elewîyî xo rayra benê

 

Xeylê herêmanê Mereşî de şar birîndar û cenazeyanê xo bi îmkananê xo binê xirban ra vet. Hetkarîya merdimanê înan yê Ewropa û yê zerrîwazan zî mîyan de pêro hetkarîyan seyyewbînan mabenê yewbînan de pare kerd. Dewa kurdê elewîyî de na rewşe zêde vejîya raşte.

 

Dewa Aşagi Kuyucular 

 

 

Dewa Aşagi Kuyumcularî ke girêdayeyê qezaya Kurdoxlî ya Mereşî bî û xeta fayî binê dewa ra derbaz bîyêne de xisarêk gird qewimîya. 55 keye dewe de estbî, înan ra 53 keyeyî serûbin bî. Keyeyê ke mendî de zî xisarê girdi virazîyayî. Dewe de 3 kesî binê xirban de merdî. Dewijî baxçeyê Keyeyê Cemî yê dewe de bi îmkananê xo konî girewtî û ronayî. Konê ortax yê dewe de werd zî yeno viraştiş.

 

Ver bi komunê dewe

 

 

Hetkarîyê ke yene baxçeyê keyeyê cemî yenê komkerdiş û dima ra goreyê îmkananê hemwelatijan yenê parekerdiş. Ekîbê kordînekerdişî ke 4 kesan ra pê yeno ameyo awankerdiş. Ekîbo ke ameyo awankerdiş seba awankerdişê komunê dewe bîyo gama yewine. Her çend ke hema sîstemê komunî nêro awankerdiş zî dewijê dewe lazimîyanê xo dîyar kenê, xo kordîne kenê û qaseyê lazimîya xo çî wazenê. 

 

Kar û barê wedaritişê xirban yew aşme ra dima binê koordînasyonê Wezaretê Dormeyî ra hetê ekîbê Mudirîya 20ine ya Herêma Karê Awe ya Dewlete (DSÎ) ra yeno rayraberdiş. Derheqê awa şebekeyî de îqazê wa kes awe nêşimno ame kerdiş. Hemwelatijî awa şimitişî awa depoyê zerrîwazanê Şaredarîya Anqara û Bornovayî rê ameya şirawitiş ra temin kenê. Her çend ke îqaz bêro kerdiş zî çareserîyêke çin a. Dewe de cereyan tena yeno keyeyê cemî. Têlê cereyanî yê heme dewe kewtî war û erd de rayîran ser de yê.

 

Mijdanîya darê mişmişan komelo newe yo

 

 

Vera heme rijnayîş û dejê erdlerzî dewe de xoza xo newe kena. Darê mişmişan mîyanê xirban de vilikanê xo akerd û mijdanîya komelo newe danê.