ANQARA - Rojnamegerê cinî yê ke Zîndanê Cinîyan yê Sîncanî de tepişteyî seba mexduranê erdlerzî pakêtanê taybetan hadre kerdî û waştî ke bi rayîrê HDP û ÎHDyî bişirawê. La pakêtê tepişteyan hetê rayîrberîya zîndanî ra ame astengkerdiş û tepişteyan rê ame ferzkerdiş ke pakêtanê xo bişirawê AFADî rê.

 

Rojnamegerê cinî yê ke Zîndanê Cinîyan yê Sîncanî de tepişteyê seba mexduranê erdlerzî pakêtanê taybetan hadre kerdî. Rojnamegeran waşt ke bi rayîrê Komeleya Heqanê Merdiman (ÎHD) û Partîya Demokratîke ya Şaran (HDP) pakêtan bişirawî herêma erdlerzî. La paketê tepişteyan hetê rayîrberîya zîndanî ra ame astengkerdiş. Tepişeyan rê ame ferzkerdiş ke pakêtanê xo bişirawê AFADî rê.

 

Derheqê babete de rojnamegera ma Oznur Degere mektubêk rojnameger û nuştox Huseyîn Aykolî rê şirawit û bale ant rewşa bîyayeyî ser. Oznure mektuba xo de wina bale ancena astengkerdişê pakêtan ser: “Tirkîya de şar tora paştîdayîş û hetkarîye awan kerd. Ma zî waşt ke herêma erdlerzî rê pakêtanê hetkarîye hadre bikerê û paştî bidê mexduranê erdlerzî yê cinî. Ma kelepulê pakîye kantînî ra girewt û ma defîna mîyanê kolîyan. Seba ke bawerîya ma bi AFAD û Kizilayî nîna ma waşt ke pakêtanê xo bişirawê ÎHD û HDPyî.

 

Ma rayîrberîya zîndanî rê malumat şirawit la cewab nêdîya ma. Ma baş zanê ke heqê ma yê esasîyan ra yo ke ma bi kargo kolîyan bişirawê. Rayîrberîya zîndanî bi israr ma ser de ferz keno ke ma pakêtanê xo bişirawê AFADî. La ma nê çîyî qebul nêkenê.”