MERKEZÊ XEBERAN - Bîşeng Anike ya ke Şirnex de ameye qetilkerdiş bî sembola Newroze û dima ra rayîrê bi hezaran kesan akerde. Bazinê keske sûre û zerde ke îşkencexaneyî de destê aye de bî, mesajê xoverdayîşî hema zî dano.

 

Newroze tarîxê şarê Kurdî de cayêk muhîm gêna û têkoşînê azadîye gird kena. Newroza emserrî bi şîarê ‘Her ca Newroze Her dem azadî’ yena pîrozkerdiş. Newrozê Kurdan ke mohrê xo da tarîxî ra yew zî Newroza 1992î ya. Newroza na serre de Cizîr, Nisêbîn, Şirnexî mohrê xo dabî tarîxî. Eynî wextî de bi serkêşîya cinîyan derbazê tarîxî bî. Nê Newrozan ra yew zî yê Şirnexî ke serra 92î de pê ame yo.

 

Nîno zanayîş ke çend kesî ameyî qetilkerdiş

 

Şirnex de îqtîdarê o wextî Newroze qedexe kerdbî û her ca de polis û leşkeran bi ca kerdbî. Hêrişê şîdetin pê ameybî. 47 kesî raşteyê Newroze de pêro pîya 103 kesî a roje ameyî qetilkerdiş. Goreyê dayeyanê fermîyan zî na hûmare 12a.

 

Furyayê tepiştiş û destbendkerdişî

 

Kişta hemwelatîyê ke ameyî qetilkerdiş û birîndarkerdiş, bi desan kesî zî ameyî destbendkerdiş û tepiştiş. Xeylê hemwelatîyê Şirnexî zî dimayê hêrişan mecbur mendî ke koç bikerê.

 

Sembola Newroze Bîşenge

 

Newroza 92an ya Şirnexî de xoverdayîş, serewedaritiş û qirkerdiş estbî. Şar vera qedexe û qirkerdişan de xover da. Badê Newroze hirê rojan bajar wêrankerdiş. Na Newroze wina derbazê tarîxî bî û Bîşenge estbî. Nameyê xo tarîxî de nuşt. Bîşeng Anike bî sembola Newroze. Bîşenge emrê xo yê şenikîye de têkoşînê azadîye şinasna. Wendekarê liseye bî. Tesir bi heme hetan kerd. Roja Newroze zî vejîyabî raşteyan. Aye zî mîyanê şarî de bî. Furyaya destbendkerdişî de aye zî ameye destbendkerdiş û berdî îşkencexane.

 

Zura fermî

 

Bîşenge seba ke bi vindetişê xo yê mektebî ameyêne şinasnayîş, bi taybetî nê semedî ra ameybî hedefgirewtiş. Badê hirê roje yê îşkencexaneyî cenazeya Bîşenge dîyena keyeyê aye. Îdîa kene ke Bîşenge xo kişta. Hem zî pê çeka binê cayê polîsêk. Walîyê dewlete vat ke ‘Kênaya ciwane mabenêk xo ra şina, aye mîyanê cayê polîsêk nobedare de rakewtêne ke boya xo bida. Tîya de çeka binê nivînê polîsî gêna û verdena sereyê xo.’ La keyeyê Bîşenge wexto ke cenaze gêno vîneno ke bedenê Bîşenge mîyanê gonî de yo. Bazinê keske sûre û zerde yê mîyanê kulmê aye de bî her çîyî vatêne. Bîşenge hêzê xo bazino ke kulmê aye de bî ra girewtbî û zura fermî baş vatêne.

 

Bi hezaran Bîşenge

 

Dimayê serran îtîrafkerêk zî vat ke Bîşenge ameye qetilkerdiş. Zura fermî ya dewlete zî deşifre kerd. La derheqê hedîseyî de tu çîyêk nêame kerdiş. Bîşenge ewro hema zî sembol a. Bi hezaran Bîşengê ke nameyê aye wedaritî rayîrê aye ser de şîyî.