ÎZMÎR - Cinîyan dîyar kerd ke Newroze erdlerzo ke qewimîya vera hîssin derbaz biba zî do waştişê xo yê azadî û têduştî berz bikerê û sey 8ê Adare do raşteyan de bê.

 

Îzmîr de bi serkêşîya Tîfaqê Ked û Azadîye do Newroze 19ê Adare de saet 13.00î de Raşteyê Gundogduyî de bêra pîzrokerdiş. Emserre di erdlerzê girdî ke merkezê înan Mereş bî vera hîssêk xirab bibo zî seba waştişê azadî û têduştî do şar raşteyan de bo. Cinîyan seba tewrbîyayîşê Newroze veng dayî.

 

Derheqê babete de Endama Partîya Kede Emîne Uyare qisey kerd û da zanayîş ke vera heme polîtîkayê teda û çinîkerdişî do şar raşteyan de waştişanê xo bîyaro ziwan ser û vat: “Bobelatê erdlerzê girdî de bi hezaran hemwelatijî dinyaya xo bedilna. Coka ra ma Newroze hîssin pêşwazî kenê. Ma do hêrsê xo yê hemverê bêtedbîrîyan, erê ameyîşê ekîbanê xelisnayîşî bîyarî ziwan ser. Newroze do ewro bi hawayêke xurt biba wesîleya torê paştîdayîşî. Ma heme kesî pawenê. Sey Partîya Kede ma Tirkîya de aştî wazenê.”

 

‘Do seba şîyayîşê îqtîdarî sloganan berz bikerê’

 

Rayîrberîya Partîya Têgêrayîşê Kede Mizgîn Sumbule zî dîyar kerd ke weçînayîşo ke do pê bêro vera plan kenê ke Newroze bi coş pîroz bikerê la erdlerzê ke qewimîyayî vera bi hîssêk xirab pêşwazî kenê. Mizgîne vat: “Erdlerzî ra dima cuya ma bedilîya. Newroza emserrî do seba paştîdayîşê şarî û herêma erdlerz bêra kerdiş. Ma hewl danê ke biherikî raşteyan. Ma do 19ê Adare de roja yewşeme de Raşteyê Gundogduyî bî. Ma her kesî dawet kenê. Ma do seba cuyêka azad û têduşt no îqtîdarî bişirawê. Ma do bi slogananê xo yê ke do îqtîdarî bişirawî raşteyan de bê.”

 

Rayîrberîya HDPyî ya Îzmîrî Nerîman  Bîrlîklere zî ercnayîşanê xo de dîyar kerd ke do bi sloganê ‘Her ca Newroze Her dem azadî’ raşteyan de bê û bi kêfweşî sey 8ê Adare raşteyanê Newroze de bê. 

Yenî Demokrat Kadin ra Zîlan Taybogaye zî da zanayîş le do têkoşînê xo yê cinîyan û serewedarnayîşê 8ê Adare bibî raşteyan û seba ke sîstemo helisnaye ra hesab bipersê do Raşteyê Gundogduyî de bê.