Gulîstan Dursun

 

DîLOK – Hemwelatîya taxa Kayabaş Hanîfe Durmaze dîyar kerd ke badê erdlerzî zinarê ke kewtbî rayîran ser vera hetkarî erê ameye û wina vat: “Nizdîyê 10 heywanê mi telef bîyî. La nêwazena dewa xo biterikna. Ma kone de manenê. Wexto ke firtone û varan yeno ma zehmetî ancenê. Ma wazenê ma rê çareserîyêk bêro dîyîş.”

 

6ê Sibate de di erdlerzê ke bi girdîya 7.7 û 7.6 de qewimîyayî 11 bajaran de bî sebebê texrîbatê girdan. Nê bajaran ra yew zî bajarê Dîlokî bî. Dewijê Kayabaşi yê girêdayeyê qezaya Islahîye yê Dîlokî nika bi îmkananê xo têkoşînê cuye danê. Zinarê ke erdlerzî de koyan ra kewtî war bî sebebê qefilnayîşê rayîran. Coka ra hirê roje ra tepîya hetkarî şî dewe. Hema zî herême de lazimî bi xeylê çîyan esta û riske kewtişê zinaran dewam keno.

 

Hemwelatijî konan de cuya xo îdame kenê û hewl danî ke kelepulanê xo binê xirban ra bixelisnê. Heto bîn de zî serra 1996î de herême de laser weriştbî û xeylê kesî dinyaya xo bedilnabî û zirarêke malî qewimîyabî.  

 

Seba xelisnayîşî kesêk nêame…

 

Cinîya bi nameyê Hanîfe Durmaze da zanayîş ke erdlerzî de xeylê merdimê aye dinyaya xo bedilna û keyeyê aye zirarêk gird bî û hetkarî zaf erê ame. Hanîfeye wina dewam kerd: “Şar bi îmkananê xo cenazeyan binê xirban ra vet. Awanîyê ke herre ra virazîyabî xeripîyayî. Seba xelisnayîşê merdiman kes nêame. 10 rojan konê ma çinî bî. Ma 14 kesî pîya axur de mendî. Ma bi heywananê xo reyde mendî. Hetêk de heywanî heto bîn de zî ma estbî. Rayîrê dewa ma ame girewtiş. Zinar kewtî rayîr ser. Coka ra zî hetkarî erê ame.”

 

‘Ez dewa xo terk nêkena’

 

Hanîfeye ard ziwan ke bi miqatekerdişê heywanan, ramitiş û citkarî îdareyê xo kena û wina qiseykerdişê xo peynî kerd: “10 heywanê telef bî. La herra ma baxçe û rezê ma tîya de yê. Ez nêwazena dewa xo terk bikera. Ma kone de manenê. Wexto ke firtone û varan yeno ma zehmetî ancenê. Ma wazenê çareserîyêk bêra dîyîş.”