Melîke Aydin

 

ÎZMÎR - Nûdem Duraka ke deyîranê kurdî vatêne û coka ra ameye tepiştiş vera nêweşîyanê xo yê giranan serbest nîna verdayîş. Şertê zîndanî yê giranî de nêweşîyê sey helîyayîşê esteyan û guatirê jehrine Nûdeme de vejîya. Her çend ke xeylê raporê nêweşîye yê Nûdeme bibî zî nîna verdayîş. 

 

Teda û zextê zîndanan dewam keno. Tepişteyê nêweşî nînê dermankerdiş û verdayîş. Seba ke tîje nêdana zerreye zîndanî nêweşî zî zêde benê. Nûdem Durake 22ê Nîsana 2015î de seba ke deyîranê kurdî vatêne ameye tepiştiş. Nûdeme şertê zîndanî û grevê vêşanîye vera nêweşîyê sey helîyayîşê esteyan û guatirê jehrine aye de vejîyayî. La her çend ke xeylê raporê nêweşîye yê Nûdeme bibî û seba aye kampanyaya mîyanneteweyî ya ‘Seba Nûdeme azadî’ (Free Nudem Durak) bêra viraştiş zî Nûdeme nîna verdayîş.

 

Seba deyîrê Kurdî 19 serrî cezaya zîndanî

 

Nûdeme Bajarokê Dêrgulê yê Şirnexî de serra 1988î de ameye dinya. Domanîya xo ra nata deyîranê kurdîyan vana. Serra 2012î de 14 serîya xo de deyîranê kurdîyan vera yena tepiştiş. Yew serre ra dima yena tehlîyekerdiş. Badê demêk kilm reyna 9 aşman reyna zîndan de manena. Nûdeme 22yê Nîsana 2015î de reyna yena tepiştiş û di dewayê cîyayan vera 19 serrî cezaya zîndanî dîyena aye. Nûdeme verê cû Zîndanê Mêrdînî mendêne la dima ra aye bene Zîndanê Tîpa Myî yê Bayburtî. 

 

Ganî teber de tedawîya aye dewam bikera 

 

Nûdeme paştî daye çalakîya vêşanîye ya Hemsereka Kongreya Komela Demokratîke (KCD) Leyla Guvene ke seba azadîya Rayberê PKKyî Abdullah Ocalanî badî destpêkerdiş. Nûdeme 1ê Adara 2019î de kewt grev û 87 rojan grev de mend. Hem şertê zîndanî vera û hem zî çalakîya grevê vêşanîye vera Nûdeme de xeylê nêweşîyî vejîyayî. Esteyê aye helîyenê û problemê aye yê dîyîşî zî vejîya. Nika Nûdeme tedawîya guatiro jehrine vînena û ganî tedawîya aye teber de bêra kerdiş. 

 

Seba Nûdeme kampanyaya azadîye 

 

Seba Nûdema ke deyîranê kurdî vat û coka ra ceza dîyaye aye raşteyê mîyanneteweyîye de kampanyaya ‘Seba Nûdeme azadî (Free Nudem Durak)’ dîya destpêkerdiş. 19ê Sibata 2022î de endamê koma muzîkî yê bi nameyê Pink Floydî yo namdar Roger Waters seba ke Nûdeme serbest bêra verdayîş veng da Serekkomar Tayyîp Erdoganî. Roger sere gitarê xo yê turneya 2017-2018î ke nê gîtarî ser de mesajê hunermendan estbî Nûdeme rê şirawit la rayîrberîya zîndanî nêverda no bireso vere deste Nûdeme. Dinya hunerî yê Tirkîya de seba Nûdeme mirde xo veng ame vetiş. 

 

Xeylê raporê aye estê

 

Vera xeylê raporê doktoran Nûdeme reyna zî serbest nîna verdayîş. Nûdeme zîndano ke tîje nêdana zerreye aye de xover dana û ganî teber de tedawîya aye bêra kerdiş.