COLEMÊRG - Sîyasetmedarê cinî dîyar kerdî ke do siba adirê Newroze Stadê Yenîşehîrî yê Geverî bêro tafistiş û vatî: "Ma do wareyan de mesajê weçînayîşî bidê û ma do azadî û aştîye biqîrê." 

 

Newroza emserr ke do bi sloganê, "Her ca Newroze, her dem azadî" û "Bi adirê Newroze reyde azadî" 43 merkezan de bêro pîrozkerdiş. Reya ewil qezaya Şemzînan ê Colemêrgî de adirê Newroze ame tafistiş. Qezaya Geverî do siba saete 10:00 de Raşteyê Yenîşehîrî de adirê Newroze bêro tafistiş. Rêxistina Partîya Demokratîke ya Şaran (HDP) ê qeza bi rojan keye bi keye, kuçe bi kuçe şarî dawetê pîrozbayîya Newroze kerdî.

 

Sîyasetmedarê cinî venga tewrbîyayîşê cinîyan kerdî.

 

'Ma do azadî û aştîye biqîrê'

 

Rayîrberîya HDPyî ya Geverî Gulcan Ceylane dîyar kerd ke bi coş û heyecanêk gird do Newroze pêşwazî bikerê û vat: “Newroza emserrî bine veristîya erdlerzî de yena pîrozkerdiş. Semedo ke dejêk gird raşte de yo. Ma do sebebê rijnayîşî Dehaqan ra bipersê. Na roje do biba roja hesabpersayîşî. Sewbîna vera pêro çîyan ma do Newroze bi xoverdayîşî pêşwazî bikerê. Ma her roje tax û kuçeyan de vengdayîşê tewrbîyayîşê Newroze kenê. Ma siba raşteyê Newroze de pîya reyna azadî û aştî biqîrê.”

 

'Seba azadîya tepişteyan ma do tîya de bibê’

 

Hemsereka HDPyî ra Geverî Halîme Sureye zî da zanayîş ke Newroza emserrî Newrozêke tarîxî ya û nê çîyan ard ziwan: “Bi serran o bi coş û heyecanêk gird Newroze yena pîrozkerdiş. Ma do emserr reyna bi eynî hîs û fikrî Newroze pîroz bikerê. Ma veng dane şarê xo ke seba azadîya tepişteyan, seba caardişê azadî û aştîye siba tewrê Newroze bibê. Ma do raşteyê Newroze de cewabê weçînayîşê 14ê Gulane bidê.”