Versucê keyeyê Şenyaşarî emelîyat de merd

  • 14:12 18 Adare 2023
  • NAROJANE
 
RIHA - Versûcê Celal û Adil Şenyaşarî, Îbrahim Yildizo ke derheqê ey de qerarê tepiştişî estbî û bi 5 serrî yo nêameyîne tepiştiş, emeliyatê mîde de merd. Emîne Şenyaşar derheqê babete de vat: “Bi zanebîyayîş ê nêtepiştî."
 
Merdim û pawitoxê parlamenterê AKPyî yê Rihayî Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerdî. Netîceyê hêrîşî de mêrde û di lajê Emîne Şenyaşar ameyî qetilkerdiş. Emîne Şenyaşar û lajê ci Ferît Şenyaşar 9ê adara 2021ine de verê Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 726ine de dewam kena. 
 
Îbrahim Yildizo versûcê keyeyê Şenyaşarî Nêweşxaneyê Merkezê Tipê Metropolî yê Mêrsînî 16ê Adare de keweno emeliyatê mîde û ê emeliyatî ra sax nêvejêno. 
 
‘Bi zanabîyayîş ê nêtepiştî’
 
Emîne Şenyaşara ma bi rayîrê telefone xo resna aye wina vat: "Ez hende verê edliyeyî de ronişta ne dewlet ne zî edalet estbî. Seba zilm ma rê bikerê bi zanabîyayîş ey nêtepiştî. Îbrahim Yildizî hem nêweşxane de hem zî dikan de zilm ma rê kerd bi 5 serrî yo derheqê ey de cigêrayîş estbî la nêame tepiştiş û nêweşxaneyêk Mêrsînî de keweno emeliyatê qijkerdişê mîdeyî. Ka no edalet ça de yo?Verê edliyeyî de hêsirê çimanê bî laser. Ma bi dewletêke bêmerhamet rî bi rî yê. Wekîlê înan bibo yê ma zî Homayê ma esto. Ma wazenê lajê mi bêro veradayîş û edaleto rast bi ca bêro.”