Rozerîn Gultekîn

 

STENBOL - Cinîyê ke şarê cîyayîyan ra yê dîyar kerdî ke têkoşînê şaran ê hemverê îqtîdaran girs beno û bale antî serê girîngîyê Newroza ke bîya sembol. Cinîyan dîyar kerdî ke hemverê zulmî bi ruhê Newroze têkoşîn kenê û do 2023ine de zî dorê adirê xoverdayîşî de bê.

 

Newroze bi serran a raşteyan de bi coş û kelecanêk pîl sey roja têkoşîn û xoverdayîşî yena pîrozkerdiş. Emsar pêwa dejê şarî raşteyê Newroze do adirê xoverdayîş û azadîye bêro gurkerdiş.

 

‘Newroze roja bindestan a’

 

Verfeka HDKyî Esengul Demîr dîyar kerd ke Newroze seba şarê Kurdî û şarê Rojhelatê Mîyanên sey roja berzkerdişê têkoşînê azadî û xoverdayîşî ya û wina vat: “Serrê peyînan de şar mîyanê şerî de têkoşînê hemparî rayra beno. Umudê ma oyo ke Newroze seba demê newe biba mijdîyanî. Newroze roja şarê bindestî yê têkoşîn kena ya. Şarê Tirkîya û Rojhelatê Mîyanên hemverê dîktatoran xo ver danê û seba nê wayîrê Newroze vejênê.”

 

Şaran ana têhet

 

Esengule da zanayîş ke Newroze şaran ana têhet û wina vat: “Verê şaran goreyê xoserbîyayîşê xo Newroze pîroz kerdêne û bi serran o şarî wareyê Newroze de yê. Newroze şaran ana têhet û seba destkewtişê xo yê hempar têkoşîn kenê. Newroze bi mîlyonan kesî reyde yena pîrozkerdiş. Seba nê rojêke tarîxî ya. Ez venga tewrbîyayîşê Newroze pêro kesan kena.”

 

Suryanî têkoşînê xo bi ruhê Newroze pîl kenê

 

Temsîlkara Sereka Komeleya Cinîyan a Suryanî Barbara Akay zî fikrê xo ardî ziwan: “Mezopotamya ke xeylêk şaristanîyan rê wayîre kerda, şarê Sûryanî rê zî kerda. 5 hezar serrî yo serê na herre de hemverê serdestan têkoşîn yeno dayîş. Dimayê her tarîtî roşnayîyêke esta. Dimayê her zulmî xoverdayîşêk bi Newroze esto. Suryanî bi xeylêk teda zilm û qirkerdişan reyde ameyî rî bi rî. Ameyî asîmîlekerdiş. Suryanî her serre 1ê Nîsane de roşanê Akîtu ke mijdanîya wisarî, bereket û xoverdayîşî temsil keno pîroz kenê. Akîtu û Newroze şibîyenê yewbînan. Suryanî her serre 21ê Adare heta 1ê Nîsane pîrozbayîyan kenê. Bi umudê ke Newroze û Akîtu şaranê rê aştî û azadîye bîyara.”

 

Ermenî do Newroze de seba dejanê xo findan tafînê

 

Anî Kala ermenî zî dîyar kerd ke kurdî, ermenî, elewî, musliman û xeylêk bawerî û nasnameyî yenê têhet û roşanê Newroze pîroz kenê û wina vat: “Ermenî seba Newroze vanê Şubatgeş. 15ê Sibate de werdî yenê viraştiş û adir yeno tafistiş. Kurdistan de ermenîyan Newroze wina pîroz kerdêne. Dimayê koçber bîyê adetê xo dewam nêkerdê. Newroza emserr seba ma xemgîn derbaz bena. Ma do Newroze de findan tafînê û her findêk do seba hemkarîya dejê şarê herêma erdlerzî bêro tafistiş. Ma do seba şarî dua bikerê.”

 

Elewî do dorê adirê Newroze de bibê

 

Hemsereka Pêroyî ya DADî Kadriye Dogan zî bale ant serê rîtuelê bawerîya elewîyan û dîyar kerd ke heme rîtuelî serê şorişê xoza û dinya de awan bîyê û wina vat: “Mewsîmê zimistanî 21ê Kanûne de bi Gaxan dest pêkeno û dima ra Hizir yeno îdrakerdiş û dima ra zî Heftamel yeno û tewr peyîn zî bi Newroze reyde xoza gane bena. Yê dîyîn ma Newroze sey azadîya komelî ecnenê. Newroze adirê azadîye ya. Ma elewî zî emserr do dormeyê adirê Newroze de bibê.”