STENBOL - Di serrî yo agahî Raberê PKKyî Abdullah Ocalanî ra nîna girewtiş, avûkatan seba vînayîşê Abdullah Ocalanî muracatê Dadgeha Destûra Bingehîne (AYM) kerd.

 

Buroyê Huqûqî yê Asrinî, dimayê erdlerzê ke 6ê Sibate de Mereş de virazîyabi, seba Rayberê PKKyî Abdullah Ocalanî û tepişteyê bînan ê Zîndanê Îmraliyî de Omer Hayrî Konar, Hamîlî Yildirim û Veysî Aktaş pêvînayîş bi keyeyanê xo û avûkatanê xo reyde bikerê, muracatê Serdozgerîya Komare ya Bûrsayî û Mudûrîyê Zîndanê Îmraliyî kerdibî.

 

Dimayê ke muracat nêamebi cewabkerdiş, avûkatan 14ê Sibate de muracatê Dadgeriya Înfazî ya Bûrsayî kerdibî. Dadgerî zî cezaya dîsiplînî derpêş kerdibî ke muracatê seba pêvînayîşî red kerdibî. Avûkatan zî dîyar kerdibi ke muracatê înan seba bobelatêk xozayî yo, coka ganî nêro astengkerdiş û seba nê muracatê Dadgeha Cezaya Girane ya 1ine ê Bûrsayî kerdibî. Dadgehe zî 22yê Sibate de derpêş kerdibi ke qerarê dadgerîye goreyê “qeyde û qanûnî” yo û muracatê seba pêvînayîşî red kerdibi.

 

Dimayê nê avûkatan îşaret bi maddeyê 20, 40 û 17ine yê Destûrê Bingehîn “Heqê cuya taybet û rêza cuya keyeyî”, “heqê heq û azadîye” û “binpaykerdişê îşkence û eziyetî” kerdî û 16ê Adare de muracatê Dadgeha Destûra Bingehîn (AYM) kerdî.

 

Muracat de îşaret bi qanûnê bîyaye ke heqê pêvînayîşî yê tepişte û hikumwerdoxan xo de hewênenê, qedexeyê îşkence û muameleyê xirab û rewşê bobelatê xozayî ke heqê tepişteyan esto têkilî keyeyê xo reyde ronê ameyo kerdiş.

 

Avûkatan muracatê xo de bale ant serê tecrîdo ke 24 serrî yo dewam keno û waştê heqê pêvînayîşî yê bi avûkatan û keyeyan reyde yo muwekîlê înan esas bêrê girewtiş.