RIHA - Bobelatê laserî ke veriştbî de 18 kesî dinyaya xo bedilnayî. Parlamentera HDPyî ya Rihaye Ayşe Surucuye da zanayîş ke sebeb îqtîdarê AKP-MHPyî yo û wina vat: “Ez na bawerîye de ya ke şar do bêwayîrbîyayîşê bobelatî xo vîra nêkero û do vajo ‘wextê to debîyo’.”

 

Goreyê dayeyanê fermîyan di erdlerzê ke 6ê Sibate de Mereş de qewimîya û 11 bajaran ser de tesîr viraşt de 49 hezar û 589 kesî dinyaya xo bedilna. Seba ke tedbir nêame girewtiş bobelato diyîne qewimîya. Vera ke çend roje ya îqaz yeno kerdiş 15ê Adare de Riha û Semsûr de laser verişt û lasero ke virazîya de 18 hemwelatijî dinyaya xo bedilna. Seba hirê cenazeyanê vînîbîyayeyan zî xebat dewam kena. Parlamentera HDPyî ya Rihaye Ayşe Surucuye derheqê babete de qisey kerd.

 

Şar bi rihê paştîdayîşî wayîrê yewbînan vejîya

 

Ayşeye dîyar kerd ke roja 15ê Adare ke bobelatê laserî veriş ra dima raşteyan de kişta şarî de ca girewtî û vat ke şik esto ke hûmara merdeyan hîna zêde biba û wina dewam kerd: “Bobelatê laserî de selahîyetdarî raşteyan de çinî bî. Senî ke şar 6ê Sibate de tena ame verdayîş, senî ke şar birînanê xo bi xo piştî lasero de veriş de zî wina bî. Şar bi kepçeyanê kîrakerdeyan xirban wedarna û merdimanê xo xelisna. Ma ne berpirsîyarêk û ne zî şaredar nêdî. Şar bi rihê paştîdayîşî wayîrê yewbînan vejîya.”

 

‘Berpirsîyarê mergan ê yê’

 

Ayşeye dewamê qiseykerdişê xo de bale ant polîtîkaya rantî ke AKP 20 serrî yo rayra beno ser û vat: “Tîya de kalikêk lasero ke verişt de dinyaya xo bedilna. Xebatkarê xelisnayîşî tîya de xebat nêkerdî. Şarê tîya terke mergî ame kerdiş. Kişta çeman îmarî rê yene akerdiş. Awanîyî yene viraştiş. Her ca pêşkêşê mutahîtan yeno kerdiş. Nê heme çîyî wextê AKPyî de bîyî. Berpirsîyarê mergan ê yê. Çatrayîrê Abîde wextê AKPyî de virazîya. Laser de tîya de can şîyî. Acaba do kam hezabê înan bido. Yê ke destûrê îmarî dane do bidê.”

 

Bêtedbîrî merdiman kişt

 

Ayşeye tewr peynî bale ant vatişê wezîrê kultur û daristanî Vahît Kîrîşçîyî ke vat ‘15 canê ma şîyî la herre resaye awe’ ser û vat: “No vatiş şermêk gird o û merdiman dejneno. No vatiş zîhnîyetê AKPyî mojneno û bêtedbîrî merdiman kişt. Prosesê weçînayîşî vernîya ma de yo. Şar erdlerz û laserî de tena ame verdayîş. Şar do nê çîyî xo vîra nêkero. Do şar weçînayîş de hesab biperso.”