ANQARA - Parlamentera HDPyî Şevîn Coşkune vat: “Heme şar na Newroze de seba ke hêrsê xo bimojno, hesab biperso û seba ke vatişê xo bivajo do raşteyan de bibo. Ma hîssin ê, ma şîn de yê, dejê ma esto. Vera înan de hêrsê ma esto û seba hesabpersayîşî ma do raşteyan de bibê.”

 

Startê Newroze 15ê Adare de Şemzînan de ame dayîş û xeylê bajaranê bînan de adir ame tafînayîş. Şar bi umudo ke peynîya AKP-MHPyî bêro do pîya hemverê rejîmê tedakerdox û tecrîdo girankerde yê serê Rayberê PKKyî Abdullah Ocalanî de yeno rayraberdiş de reyna raşteyan de bo.

 

Parlamentera Partîya Demokratîke ya Şaran (HDP) ya Muşî Şevîn Coşkune derheqê Newroza emserrî de qisey kerd.

 

Şar seba ke vatişanê xo bivajo do raşteyan de bibo

Şevîne da zanayîş ke serranê verênan de bi coş û kêfweşîye Newroze pîroz kerdêne, la emserr Newroze do bi paştîdayîşê hemwelatijanê herêma erdlerzî pê bêra û wina vat: “Ma her serre bi cinî, tutî, ciwan, kal û pîran raşteyê Newroze bi coş pir kerdêne. Ma bi hezaran raşteyan de ameyî têhet. La emserr erdlerzî vera ma bi hîssin Newroze pêşwazî kenê. Emserr erdlerzî vera hewayê kêfî çin o. Xeylê cayan de do eşkerayî û mîtîngî pê bêrê. Ma mîlyonan pawenê raşteyanê Newroze. Şar seba hesab persayîşî, hêrsê xo bîyaro ziwan ser, do raşteyan de bo. Ma bi dejin ê. Şînê ma esto. La ma hende zî hêrsin ê. Seba hesab persayîşî ma do raşteyanê Newroze de bê.”

 

Xoverdayîşê weçînayîşî ra ver

Şevîne dîyar kerd ke Newroze roja xoverdayîşê hemverê zilmî ya û wina vat: “Newroze roja têkoşînê Kawayê Asinkarî ya ke hemverê Dehaqo zalim de têkoşîn kerd. No adetê têkoşînî yê hemverê Dehaqan dewam keno. 2023î de zî Newroze Newroza xoverdayîşî ya. 20 serrî yo ke Kurdî hemverê zilmê AKPyî de têkoşîn danê. Polîtîkaya hêrişî hemverê Kurdan de yena rayraberdiş. Amacê na Newroze no yo ke AKP bêro şirawitiş û herinda ci de demokrasî û aştî bêro caardiş. Coka ra na Newroze muhîm a. 14ê Gulane de zî do cewab bêro dayîş.”

 

‘Ma do hesab bipersê”

 

Şevîne qiseykerdişê xo wina dewam kerd: “Weçînayîşî ra ver na Newroze muhîm a. Seba ke AKPyî ra hesab bêro persayîş xeylê muhîm a. Îhmalkarîya AKPyî bî sebebê girdbîyayîşê bobelatî. Ma nê erdlerzî de reyna dî ke dewlete bi heme hêzê xo hemverê Kurdistanî de hêriş pê ana. Wexto ke babete bena cinî û Kurd ma hêzê dewlete vînenê. Ma erdlerzî de nê çîyî hîna baş dî. Hetkarî û paştîdayîşê Kurdan ameyî astengkerdiş û konî ameyî rotiş. Ma do hesab bipersê.”

 

Newroze heybetin yê verêne

 

Şevîne dewamê qiseykerdişê xo de bale ant rihê Newroze ser û vat: “Newrozê tewr heybetin Newrozê ke mesajê umudin û xoverdayîşî ameyêne şirawitişî. Serranê 90an de vera teda û qedexeyan şar vejîyayêne teber û Newroze pîroz kerdêne. Cizîr û Nisêbînî de bi seyan kesî ameyî qetilkerdiş. Wexto ke ma ewnîyenê Newroza ke rihê tewr heybetin ci de estbî ya 2013 bî. Mabenê 2013-2015an de prosese muzakereyî estbî.”

 

‘Ma vatişê xo reyna vanê’

 

Şevîne wina peynî ard: “Polîtîkaya tecrîdî tesîrê xo bi heme hetan ser de kerd. Ma do raşteyanê Newroze de reyna bîyarî ziwan ser. Tecrîdê Îmraliyî heme hetan ser de tesir viraşto. Tecrîd serê heme şaran de pê yeno. Ma waştişê xo seba muzakereyan raşteyanê Newroze de bîyarî ziwan ser. Start 15ê Adare de Şemzînan de ame dayîş. Final zî do 21ê Adare de Amed de bibo. Ma do hemverê îqtîdaro faşîst û rantî de raşteyan de bê.”