Melîke Aydin

 

DENÎZLÎ - Cinîyê ke Denîzlî de herikîyayî raşteyê Newroze azadîya Rayberê PKKyî Abdullah Ocalanî waşt û vatî ke do hemverê hedefgirewtişê destkewtişê cinîyan yê hetê îqtîdarî do serewedarnayîşê xo gird bikerî.

 

Bi serkêşîya Partîya Demokratîke ya Şaran (HDP), Tevgerê Cinîyanê Azadan (TJA), Kongreya Komela Demokratîke (KCD) û Partîya Çepe ya Keskan Manîsa, Mugla Aydin, Denîzlî, Balikesîrî de Newroze bi şîarê “Her der Newroz, Her dem Azadî” û “Bi adirê Newroze ver bi azadîye ” ameye pîrozkerdiş. 

 

Denîzlîye de Bazarê Esentepeye de Newroze ameye pîrozkerdiş. Dayîkê Aştîye, keyeyê tepişteyan, hêzê Kede û Demokrasîye û bi seyan kesî tewrê pîrozkerdişê Newroze bîyî. Hemwelatîyî bêmaben sloganê ‘hukmat îstîfa’ berz kerd.

 

Hedîye Kayaye qiseykerdişê xo de bale ant tewrbîyayîşê xo yê Newroze ser û wina vat: “Ma seba heqê xo yê ziwanî tewrê Newroze benê. Ez seba Şarê Kurdî serkewtiş wazena.”

 

Gule Toke da zanayîş ke seba partîya xo, azadîya xo û nasnameyê xo tewrê Newroze bena û wina dewam kerd: “Ez her serre tewrê pîrozkerdişê Newroze bena. Ez timî yena. Ez umud kena ke aştîyêke bi ercaye pê bêra û tepişteyê zîndanan azad bibî.”

 

Zeynep Akarine zi seba Şarê Kurdî serkewtiş waşt û wina ercnayîşan kerd: “Ganî serekê ma zîndan ra bivejîyo. Selahattîn Demîrtaş ganî zîndan ra bivejîyo. Ma seba heme cinîyan cuyêka azad wazenî. Jin jiyan azadî." 

 

Verfeka Partîya Çepe ya Keskan ya Denîzlîye Emîne Yalçine zî wina hîs û fikranê xo pare kerd: “Ganî ma baş bibî. Coka ra zî ganî şarê ma reyna werizo payan ser. Çend ke zerrîya ma bideja zî reyna ma ameyî têhet. Ma seba way û birayanê xo, seba caardişê aştîye ma mecburê ke têkoşîn bikerê. Seba welatêk seyyewbînan û azade ganî ma bêrê têhet. Şer feyde nêkeno. Peynîya şerî de rijnayîş, feqîrî û vinîkerdiş esto.” 

 

Cinîyan ra tewr peynî Paştîdayîşê Morî ra Dîlan Îpeke qisey kerd û dîyar kerd ke roja 21ê Adare nîşaneyê xoverdayîşî ya û vat: “Ma sey cinîyê ke her roje xover danê tîya de yê. Ma fek waştiş û heqanê xo ra vera nêdanê. Nika prosesê weçînayîşî dest pê keno û ma vînenê ke nika ra dişmenîya cinîyan yena kerdiş. Îqtîdaro faşîst her hetî ra dişmenîya xo ya hemverê cinîyan mojneno. La ma cinîyî do hemverê dişmenîya cinîyan yê îqtîdarî de serewedarnayîşê xo gird bikerê.”