MÛŞ - Şarê Milazgirî bi sloganê  “Ma do bi xoverdayîş serbikewê” û “Bicîwîyo Serek Apo” adirê Newroze tafistî.

 

Şarê Milazgirê Mûşî Newroza xo bi coşêk pîl pîroz kerd. Dimayê 5 serran destûrê pîrozbayîya Newroze ameye dayîş û wareyê Newroze de bi beyreqan amebi xmilnayîş. Şarê Milazgirî raşteyê pîrozbayîye de sloganê “Biciwîyo Serek Apo”, “Biciwîyo xoverdayîşê zindanan”, “Şehîdî nêmirenê” û “Bijciwîyo Newroze” berz kerd. 

 

Pîrozbayî dimayê deqeyêk rêzgirewtişî yê seba kesê têkoşînê azadî û demokrasî dinyaya xo bedelnayê dest pêkerd.

 

Parlamenterê Partîya Demokratîke ya Şaran (HDP) ê Amedî Îmam Taşçier pîrozbayîye de qisey kerd û vat, seba erdlerzî şîne de yê. Îmam, bi domdarî wina vat: “La ma hemverê nê yê polîtîkayê rantî, raşteyê Newroze xo ver bidê. Ma na Newroze seke reaksîyonê hemverê tecrîdê girankerde yê serê birêz Abdullah Ocalanî pîroz kenê. Şarê ma yê ercîyaye, azadîya şarê kurdî bi yewîya neteweyî mumkun o. Seba ma çîyo tewr girîng, awankerdişê yewîya neteweyî ya şarê kurdî yo. Xebatê ma yê seba nê dewam kenê. Sey nê raşteyî, ganî ma her ware de ma têhet de bê. Se serrî verê Lozan de welatê ma Kurdistan kerdî çar parçe û bêrê ma pîya bi Newroze reyna bikerê yew.” 

 

Dima ra zî Parlamentera HDPyî ya Mûşî Şevîn Coşkun qisey kerd û dîyar kerd ke Newroz sembola xoverdayîşê hemverê zulmî yo û wina derg kerd: “Mijdanîya cuyêka newe, îradeyê lehengî yo. Newroza şima pêrûne pîroz kena. Bi hezaran serre yo herra Mezopotamyayî de adirê Newroze nêtefîyayo. Herra Kurdistanî yena manaya serewedaritiş û xoverdayîşê hemverê zulmî. Şexsê Mazlum Dogan de ke bedenê xo bi kîbrîtan kerd adirê Newroze, ez reyke bîn Newroza şima pîroz kena. Newroza emserr ma seba qurbaniyê erdlerzî bi xemgînîyêk pîl pêşwazî kenê. Ma bî şahidê nêbaşî yê sazgehê dewlete û bêtedbîrîyê. Şarê ma bi rojan binê xirbeyan de terkê merdişî kerdî. Ma dî ke sazgehê dewlete tena gamêke babeta bena kurdî kewena werte. Ma hêrişê vizêr de ke tehemûlê înan seba Newroze çin o. La ma reyke bîn vajê ke do destbendkerdiş û hêrişê înan nêeşkenê sere bi ma bidê tewênayîş. 14ê gulane seba komarêke demokratîk firsendêk tarîxî yo. Ma 14ê gulane de nê îktîdarê zordestî bierzê sergoyê tarîxî. Heta ke ma azad benê û têduşt benê do têkoşînê xo bi ruhê Newroze dewam bikerê.”

 

Dewam de Şevîne bale ant serê polîtîkaya tecrîdî yê serê Rayberê PKKyî Abdullah Ocalanî û wina vat: “Polîtîkayê serê dişminîyê kurdan yeno kerdiş, yeno manaya girankerdişê  tecrîdî û domnayîşê polîtîkaya şerî yo. Rayîrê çareserî Îmrali yo. Rayîrê çareserî birêz Abdullah Ocalan o ke vano, ‘ez eşkena nê problemî hewteyêk de çareser bikerî.” Hemverê tecrîdê girankerde û polîtîkayê şerî, ma do cuya demokratîk û azad awan bikerê.”

 

Dimayê qiseykerdişan, îdarekarê HDP û Partiya Çepî ya Keskî adirê Newroze wey bikerê.

 

Welatijê ke dormeyê adirê Newroze xelekê govende gernayî, sloganê “Ma do bi xoverdayîşî serbikewê” û “Biciwîyo Serek Apo” berz kerdî.

 

Pîrozbayîya Newroze bi deyîranê hunermendan peynî bî.