Melîke Aydin

 

ÎZMÎR - Cinîyan bale ant muhîmîya Newroza Şarê Kurdî ser û da zanayîş ke wa tepişteyî heme biresê azadîya xo û hemverê kolonyalîstîye de azadîya şaran pawit.

 

 Partîya Demokratîke ya Şaran (HDP), Partîya Herêmê Demokratîkî (DBP), Tevgerê Cinîyanê Azadan (TJA), Kongreya Demokratîke ya Şaran (HDK) û Partîya Keske ya Çepe bi şîarê “Her der Newroz, Her dem Azadî” û “Bi adirê Newroze ver bi azadîye ” Newroze Raşteyê Gundogduyî yê Îzmîrî de bi tewrbîyayîşê hezaran kesan pîroz kerdî. Wexto ke Îzmîr bêro vatiş Newroza Kadîfelkale û Çimetepe yena vîrê merdimî. Cinîyê ke bale natî muhîmîya Newroza şarê kurdî ser dayî zanayîş ke wa heme tepişteyî biresê azadîya xo û hemverê kolonyalîstîye de azadîya şaran pawitî.

 

‘Ez bêrîya Newroza Mêrdînî kena’

 

Şukriye Aka ke 35 serrî ya Mêrdînî ra koçê Îzmîrî kerda û wina vat: “Verê cû zaf weş bî. Nika dejê canê xo vera ez nêeşkena şêra la ez bêrîya Newroza Mêrdînî kena. Nisêbîn, Mêrdîn, Mîdyad. Ez Nisêbînî ra ya. Wa herkes şêro Newroze pîroz bikero. Ma wazenê ke na Newroze aştî û azadîye seba şarê kurdî bîyara.”

 

'Newroze cayo ke kurd tede xo mojnenî ya’

 

Muşerref Nohute ard ziwan ke seba ke aye kurda sereberz a û wina vat: “Ez wazena her ca de kurdî bêro qiseykerdiş. Ez zêde bi kurdî nêzana la werikêna ez bizanayêne. Ganî kurdî her ca de xo bimojnî. Seba şarê kurdî kurdê ke şinê Newroze sey ‘terorîstî’ asîyenê. Coka ra zî reaksiyon mojnenê. La wina nîya. Newroze cayo ke kurd tede xo mojnenî ya.”

 

'Kurd çinî yenê hesibnayî’

 

Ayten Akyuze da zanayîş ke ê pêroyê taxe tewrê Newroze benî û vat: “Kurd çinî yene hesibnayîş. Ez hemverê nê çîyî de ya. Ez wazena herkes seyyewbînan bibo. Tay hetî nêverdê ke kesêk bi azad sîyasetê xo bikerî. Ewro ez vaja ez kurda se beno? Tewrê hemverê ma exlaqî yo.”

 

'Ma dewaya xo domnenî’

 

Hanîfe Tanbogaye zî ard ziwan ke Newroze seba bîyayîşê kurdan zaf muhîm a û wina vat: “Ma kurdî ma dewaya xo domnenî. Ma kincanê xo hadre kenî û her serre tesilî şinê. Kesêk nêeşkeno ma asteng bikero. Kurd esto kurd bi cesaret o.”

 

'Şarê Kurd binê kolonyalîstîye de yo’

 

Sadîye Akalane zî dîyar kerd ke Kurd binê kolonyalîstîye de yo û vat: “No 25 serrî yo ke Îzmîr de ya. La ez her serre şina Newroze. Serranê verênan de zehmetî estbî la hîna weş bî. Mîyanê her şert û mercan ke tede teda û zehmetî estbî de ma şîyêne Newroze. Seba ke ma kurdî her ca de teda bi ma yena kerdiş. Ma do her tim heqê xo, ziwanê xo û waştişê xo yê azadîye bîyarî ziwan ser.”

 

'Ma wazenê tepişteyî biresî azadîya xo’

 

Cinîyan ra tewr peynî Eytan Gulmeze qisey kerd û vat: “Newroze seba kurdan muhîm a. Her çend ke ma hîssê erdlerzî bicuyî zî ma Newroza heme kurdanê Kurdistanî pîroz kenî. Do emserr xeylê qelebalix bibo. Ez fikirîyena ke ma do weçînayîş de zî ser bikewî. Ma sey kurdî yewîye wazenî. Ma erdlerzî vera serweşî û seba kesê ke weş xelisîyayî şîfa wazenî. Ma wazenê ke tepişteyî biresê azadîya xo.”