Rojda Aydin-Dîlan Babat

 

AMED - Cinîyê ke tewrê Newroza Amedî bîyî dîyar kerdî ke ganî azadîya fîzîkî ya Rayberê PKKyî Abdullah Ocalanî bêro garantîkerdiş û vatî ke bê Abdullah Ocalanî komel azad nêbeno.

 

Newroza ke emserr 42 merkezan de ameye pîrozkerdiş û dîyarîya kesê ke erdlerzê Mereşî de dinyaya xo bedilnayî ameye kerdiş, vizêr Amed de bi bi şîarê ''Her ca Newroz, her dem azadî'' û ''Bi adirê Newroze ver bi azadîye'' final bî. Newroza Amedî ya ke sey şayîya fînalî ya Vakurê Kurdistanî yena kerdene bi coşê girdî ameye pîrozkerdene. Amed de mesajê muhîmî vejîyayî raşte. Nê mesajan ra yew zî peynîkerdişê tecrîdê sere Rayberê PKKyî Adbullah Ocalanî bî ke 23 serrî yo dewam keno. Sewbîna raşteyê Newroze de zî tewr zêde ciwan estbî û seba azadîya Abdullah Ocalanî vengê xo kerdî yew û berz kerdî. Raşteyê Newroze de bi taybetî siloganê “Biciwîyo Serek Apo”, “Bê Serek Cuye Nêbena”, “Slam slam Îmraliyî rê hezar slam”, “Ciwan fedaîyê Rayber Apo yî” û “Ma leşkerê Rayber Apo yî” berz bîyî.

 

Cinîyê ke tewrê Newroza Amedî bîyî, tecrîdê serê Abdullah Ocalanî şermizar kerdî û azadîya ci ya fîzîkî waştî. 

 

‘Bê Serek cuye nêbena’

 

Zara Kulture dîyar kerd ke 23 serrî yo Abdullah Ocalan binê tecrîdî de yo û waşt ke wa tecrîd bi lez bêro wedaritiş. Zaraye Newroza Abdullah Ocalanî pîroz kerd û wina vat: “Bi girankerdişê tecrîdî reyde şer zî hîra bî. Ma wazenê ke tecrîd bêro peynîkerdiş ke no şer biqedîyo. Wa tecrîd bêro peynîkerdiş û berê zîndanan zî biabî. Ma wazenê ke Serekê ma mîyanê ma de bibo. Ma umud kenê ke Serek azad bibo û ma yewna serre pîya Newroze de bî. Ma azadîya Birêz Ocalanî wazenê. No hirê serrî yo ke ma tu xeberêk Serekê x ora nêgênî û ma reşa ci ra xeylê fikarin î. Ma wazenê wa lez Birêz Ocalanî reyde pêvînayîş bêro kerdiş. Heta ke Serek Apo azad nêbo komel zî azad nêbeno. Biciwîyo Serek Apo. Bê Serek cuye nêbena.” 

 

‘Wa ciwan û şarê ma heta peynî têkoşîn bikero’

 

Hedla Barane zî Newroza Abdullah Ocalan û heme tepişteyan pîroz kerd û reaksîyon mojna tecîrdo girankerde. Hedlaye zî da zanayîş ke heta kêy no şer û kiştişî do dewam bikerî û wina dewam kerd: “Domanê ma şehîd kewtî û ameyî tepiştiş. Êdî bes o. Serek rayîrê heme şaran akerd û ma do zî bi xoverdayîşî tecrîdî bişiknî. Payêna peyênema do ser bikewî. Ma azade nîyî. Ma nêeşkenê bi hawayêk azad şêrî her ca. Ma Kurd î û sere berz î. Ez do heta peynî pey Serek Apoyî de ba. No welat do rojêk azad biba. Ma do zorê Erdoganî bibî. Wa ciwan û şarê ma heta peynî têkoşîn bikero.” 

 

Azadîya Ocalanî ame waştiş

 

Zehra Gulpinare zî tecrîdê serê Abdullah Ocalanî şermizar kerd û Newroza ci pîroz kerd. Zehraye wina vat: “Ma azadîya Abdullah Ocalanî wazenê. Rojêk verê cû wa Birêz Ocalan serbest bêro verdayîş. Mîyanê şarê xo d bo. Wa Serek azad bibo û ma zî Kurdistan azad bikerî. Azadî bi Serekî mumkun o.” 

 

‘Kesê ke eşkeno azadî pê bîyaro Birêz Ocalan o’ 

 

Rojda Bîlge zî dîyar kerd ke 23 serrî yo serê Abdullah Ocalanî de tecrîdêk giran yeno kerdiş û wina vat: “Ma ewro seba Birêz Ocalanî ameyê raşteyê Newroze. Ma heq, edalet û seyyewbînî wazenê. Seba peynîkerdişê tecrîdî ma do raşteyê Newroze de vengê xo berz bikerê. Kesê ke eşkeno azadî pê bîyaro Birêz Ocalan o. Seba nê çî ma tîya de yê.”

 

‘Ma bi cil û belgê xo nêeşkenê bikewê raşte’

 

Îpek Kaçmaze zî dîyar kerd ke nêheqîyêk û bêhûqûqîyêk pîl hemverê Abdullah Ocalanî yeno kerdiş û wina vat: “Ma welatê xo de nêeşkê bi hawayêke azad biciwîyê. Bifikrîyê ma bi cilanê xê nêeşkenê bikewê raşte û ev no zî nêheqî yo. Seba ke  azadî û edalet pê bêro ganî tecrîd bêro şikinayîş. Heme şar azad o û wayîrê îradeyêk azad o. Ganî tu cîyayîyêk hetê dînî, ziwan û nasnamî de çinî nêbo û azadî pê bêro. Ez nê tecrîdî sey bêedaletî vînena. Eke Birêz Ocalan azad bibo do komel zî azad bibo. Ma wazenê no tecrîd bêro peynîkerdiş û biresno azadiya xo.”

 

‘Wa şar wurzo serê payan’

 

Fethîye Selkî zî da zanayîş ke bi serran o tecrîdêk hemverê huqûqî de yeno kerdiş û ê nê qebûl nêkenê û wina vat: “Nêheqî her tim hemverê ma de yena kerdiş. Ma zî azadîya Birêz Ocalanî wazenê. Ganî şar vengê xo berz bikero û wurzê serê payan.”

 

 

 

‘Abdullah Ocalan eşkeno azadî bîyarê’

 

Esma Ateş zî da zanayîş ke bi serran o hemverê kurdan zilm yeno rayraberdiş û vat no zî tecrîdê Îmraliyî yo û şermezar kerd. Esma, da zanayîş ke seba peynîkerdişê tecrîdî ganî şar vengê xo berz bikero û wurzê serê lingan û vat: "Azadîye ancax Ocalan eşkeno bîyaro. Eke o azad bibo do peynîya şerî zî bibo,”

 

‘Ma seyyewbînî wazenê’

 

Kader Karagoz zî azadîya Birêz Ocalanî waşt û wina dewam kerd: “Ma azadî û seyyewbînî wazenê. Azadîye zî Birêz Ocalan eşkeno bîyarê nê welatî. Azadî bê Birêz Ocalan nêbena. Wa ganî tecrîd bêro peynîkerdiş.”