AMED - HDP, bi wesîleya serrgêra tayînkerdişê qeyûmê Licê eşkerayîye da û ard ziwan ke bi tayînkerdişê qeyûman ziwan, îrade û nasnameyê kurdan nîno naskerdiş û vat, ê do weçînayîşan de cewabêk xurt bidê hukmatî.

 

Partîya Demokratîke ya Şaran (HDP), bi wesîleya serrgêra tayînkerdişê qeyûman û tuto ke hetê polîsan ra rastê îşkenceyî ame Y.D., qezaya Licê ya Amedî de eşkerayîye da. Eşkerayîya ke Parkê 15ê Temmuze kîşte Şaredarîya Licê de ame dayîş de pankartê “Qeyûm îradeyê şarî rê darbe yo" ame akerdiş. Partîya Herêmê Demokratîke (DBP), rêxistinê HDPyî yê Licê, Pasûr û Karaz, aktîvîstê Tevgerê Cinîyanê Azadan (TJA) û xeylêk welatijî tewrê eşkerayîye bî.

 

‘Qeyûm ziwan, îrade û nasname nas nêkeno'

 

Hemşaredarê Licê ke vera ci qeyûm ame tayînkerdiş Tarik Mercanî qisey kerd. Tarikî, ard ziwan ke tayînkerdişê qeyûman nîno naskerdiş îrad û nasnameyî yo û wina vat: "Awankerdişê Komara Tirkîya de dimayê komara 1954ine heqê kurdan ame binpaykerdiş û kurdî qiseykerdiş ame qedexekerdiş. Ewro no çî resa sewîyeyêka tewr berz. No teda, zulm û zordarî dewam keno. Ziwan, îrade û kulturê ma nasnêkenê. Îqtîdaro îşxalkerde û faşîşt 8 serrê peyînan de her tewir hêrişê xo serê ma de kenê. Ma nê çî qebûl nêkenê û tîya ra tepîya zî nêkenê."

 

‘Îşkence hemverê merdimayî yo'

 

Tarikî, bale ant serê tuto Y.D. ke hetê polîsan ra bi îşkenceyî reyde rî bi rî mend û wina vat: "21ê adare de bi mîlyonan welatijê ma tewrê Newroze bî. Amancê Newroze hemverê zulm û zordarî de sere wedarnayîş o. No çî tarîxê ma yê  kurdan û yê Licê de esto. Şarê Licê hertim xo ver dayo. Çend rojî verê tutêk ma ame remnayîş û îşkence ci rê ame kerdiş. Dest û payê ci ameyî girêdayîş û eştî verê newalî. Bi nê çî wazenê bimojnê ke zulmê ke verê kerdê nika zî dewam bikerê. Ma nê çî qebûl nêkenê. Senîn ke ma serranê 90î de xo ver da, ma do nika zî xo ver bidê. Senîn ke serrê  90î de dewê ma ameyî vengkerdiş, veşnayîş û ma ameyî qetilkerdiş ma sereyê xo nêtewênaû ma tîya ra tepîya zî sereyê xo nêtewênê. Ma do wayîrê tutanê xo vejîyê. Eke ma hemverê nê de nêvejîyê do hêrişê tutanê ma zî bikerê. Kesê ke nê îşkenceyî kerdê ganî derheqê îan de cipersayîş bêrê akerdiş û cezaya tewr giran bêra dayîş. Îşkence hemverê merdimayî yo. No xoverdayîşê ma hemverê zulm  û zordarî de dewam bikero."

 

Tarikî, qalê weçînayîşê 14ê Gulane kerd û wina vat: “Beno ke hêriş û kayê lêşînî bibê. La ma do wayîrê îrade û partîya xo vejîyê. Ma do weçînayîş de cewabê înan bidê."

 

Eşkerayîye dimayê 5 deqe çalakîya roniştişî û bi sloganê, “tedayî nêeşkenê ma bidê vindarnayîş", "Ma do bi xoverdayîş serbikewê" û “Destê ke dergê ciwanan beno wa bişikîyê" peynî bi.