AMED – Cinîyê ke Newroza tarîxî yê Amedî de reaksîyon û hêrsê xo yê hemverê tecrîdê serê Rayberê PKKyî Abdullah Ocalan ke 2 serrî agahî ci ra nîna girewtiş mojnayî, dîyar kerdî ke ê do tecrîdî peynî bikerê û rayberê xo azad bikerê.

 

Rayberê PKKyî Abdullah Ocalan ke 24 serrî yo Îmraliyî de binê tecrîdê girankerde yo, dimayê pêvînayîşê ey bi telefonî yê 25ê Adara 2021ine ke bi birayê xo Mehmet Ocalan reyde kerd têkiliyê ey bi temamî bi teber ra ame visnayîş û agahî ci ra nîna girewtiş. Seba Abdullah Ocalan ke tewr peyîn 7ê Tebaxa 2019ine de bi avûkatanê xo reyde pêvînayîş kerd. Muracatê avûkat û keyeyê ci bi bahaneyê cezaya dîsîplînî yenê astengkerdiş. Neweroza 2023ine ke binê versîya erdlerzî 11 bajaran tesîrê xo kerd ame pîrozkerdiş de yew babeta ke tewr zêde vejîya vernî tecrîdê serê rayberê PKKyî Abdullah Ocalanî bî. Şarê Amedî bi yew vengî bi sloganê, “Biciwîyo Serek Apo”, “Bê Serek Cuye Nêbena” waştişê xo yê azadîya Abdullah Ocalanî reyke bîn ard ziwan.

 

Cinîyê ke raşte de ma mîkrofon dergê înan kerd zî reaksîyonê xo yê hemverê tecrîdî de ma reyde pare kerdî.

 

‘Ma do zorê faşîzmî berê'

 

Zeynep Tiya derheqê tecrîdê girankerde yê serê rayberê PKKyî Abdullah Ocalanî ercnayîş kerd û vat: "Newroze de mesajê şarî eşkera bî. Seke her kesî dî, waştişê şarî peynîkerdişê tecrîdî bî. Rojeva ma tecrîd a. Ver bi weçînayîşî zî waştişê ma azadîya Abdullah Ocalan o û ma do serê nê esasî de hêzê xo bişuxulênê. Ma do faşîzmo ke tecrîd ferz keno zorê ci berê."

 

‘Ma hemverê tecrîdî tîya de yê'

 

Meymene zî dîyar kerd ke tecrîd zilm o û no zilm bi serran o dewam keno û wina vat: "Şima rewşa ma vînenê. Ma her saete yenê qetilkerdiş, ma her saete yenê tepiştiş û hêrişê ma yeno kerdiş. Bi her hawayî serê ma de yenê. Ziwanê ma, kulturê ma, bîyayîşê ma binê zulmî de yo. Ma eşkenê hemverê nê îşxalkerdişî de se bikerê? Bi taybetî bi hezaran ciwanê ma zîndanan de yê. Ma wazenê êdî no tepiştişo bêheq û huqûq peynî bibo. Tecrîd, zilm o û zordestî yo. Ganî şar bi hawayê tewr bi hêz reaksîyon ramojno. Ma ewro seba ciwananê xo, seba ameyoxê înan û peynîkerdişê tecrîdî ameyê Newroze. Ma bi hêvî yê ke nê girseyê kombîyayîşî do peynîya tecrîdî bîyarê."

 

Qadrîye Esen zî wina vat: “Ma aştîye wazenê, ma dayîkî êdî nê zulmî nêwazenê. Ganî tepişteyî zîndanan de nêmanê. Ma êdî rijnayîşê gonî nêwazenê. Ma nê zulmî ra vanê êdî bes o.”

 

‘Ma tecrîdî peynî bikerê'

 

Ferîde Gundem zî serê tecrîdî de qisey kerd: "Bi tepişteyan reyde pêro şarê ma tecrîd de yo. Hêvîya ma weçînayîş a, ma do şima reyde peynîya zulmê înan bîyarê. Waştişê ma oyo ke berê zîndanan abibê û peynîya nêheqîyan bêro. Newroze de qelebalixêk pîl esto. No qelebalixê aştîye yo. Ganî yewîya ma wina dewam bikero. Ma do tecrîd peynî bikerê. No êdî eşkera yo."

 

Afîfe zî bi nê vatişan tecrîd şermezar kerd: “Zor û zilm tepişteyan rê yeno kerdiş. Waştişê ma tena peynîardişê nê zulmî nê, waştişê ma veradayîşê tepişteyan o. Ganî no tecrîd serê pêro tepişteyan de bêro peynîkerdiş. No tecrîdê serê tepişteyan tesîrê xo serê şarî de keno."

 

‘Newe ra dayîkbîyayîşê ma yo'

 

Emîne Okşamak dîyar kerd ke hêviya înan weçînayîş a û ê do weçînayîş de biresê serkewtiş. Emîne wina dewam kerd: “Bêşik  ma do serbikewê. Waştişê ma zî azadîya Serekî ya û pêro tepişteyan a. Ganî tena tecrîd nêro peynîkerdiş, ganî ewro serekatî ewro ma reyde Newroze de bîne. Ganî xebere ci ra bêro girewtiş û peynîya tecrîdî bêro. A roje newe ra dayîkbîyayîşî ma ya. Homa heqê ma kesê ke tecrîd serê ma de ferz kenê rê nêverdo."

 

‘Ganî ma nêtersê'

 

Leyla Kale zî serê tecrîdî de wina vat: "Ez hêvî kena ke ma weçînayîş de serbikewê û biresê amancê xo. Amancê ma peynîbîyayîşê zulmî yo. Ciwanê ma yan serê koyan yan zî zîndanan de yê. Her ca înan rê zulm yeno kerdiş. Ma hêvî kenê ke berê zîndanan bêrê akerdiş. Eke ma tecrîdê serê xo peynî bikerê do tecrîdê serê tepişteyan zî peynî bikerê. Ganî ma yew bibê û weçînayîş de hemverê tecrîdî rayanê xo bidê xo. Hêvîya ma weçînayîş a. Ma do peynîya nê zulmî bîyarê. Ganî ma êdî ma vengvetiş ra nêtersê. Ma sey dayîkî tim hemverê tecrîdî de, hemverê gonîya ke yena rijnayîşî de reaksîyonê xo bi hawayêk şîdet ramojnê."