MERKEZÊ XEBERAN - Îlham Ehmeda ke şayîyê Newroza emserî erjna, veng da hêzanê mîyanneteweyî ke semedê qedînayîşê polîtîkaya qirkerdişî ya vera kurdan, wa berpirsîyarîya xo bîyarê ca û vat: "Ganî Peyamê Lozanî seserrîya xo de newe ra verê çiman de bêro derbazkerdiş û seba sîyasetê qirkerdişê serê kurdan bêro peynîkerdiş."

 

Newroza emserî sere de Kurdistan, çar hetanê dinya de bi şîarê ”Dem Dema Azadîye” hetê bi mîlyonan kesan ra ameye pîrozkerdene û mesajê azadîye, serewedaritiş, xoverdayîş û têkoşînî ameyî dayene. Hemsereka Heyetê Rayberdişî yê Meclîsê Sûrîyeya Demokratîke Îlham Ehmede mesajê vîdeoyî şawit resepsîyonê Newroze yê Îngîlîstanî. 

 

Îlham Ehmed ard ziwan ke serrgêra serkewtişê şarê Rojhelatê Mîyanên ê hemverê Dehaqan, Newroze pîroz kenê û vat: ”Newroze senî ke nameyê ci ra zî yeno famkerdene, semedê kurdan û şaranê Rojhelatê Mîyanênî yena manaya roja newî. Badê ronayîşê dewletanê serdestan û parçekerdişê Kurdistanî  îşxalkeran bi hewayêkê sîstematîkî kerd ke Newroze kurdan rê bikerê qedexe.  Adirtafînayîş zî xeylêk wext qedexe bi. Ewro  Tirkîya, Îran û Sûrîye de vera ziwan, kultur û ciwîyayîşê kurdan qedexeyî est ê ke gerek cade bêrê wedaritene. Newroza 2023yî gerek sîyasetê vera kurdan bêro bedilnayene û semedê dewaya şarê kurdî ya heqdare ewnîyayîşo newe bêro bewlîkerdene.

 

Bitaybetî seserra Pêkerdişê Lozanî de gerek sîyasetê vera kurdan newe ra bêro destgirewtene. Rengî çend zaf bê, cuya hende rind bena. Bi rejîmê yewrengî merdimîye yena îmhakerdene. Çiqas şar û kulturî zaf bê hende cuya rind bena. Ma sey kurdanê Sûrîye yanî kurdanê Rojawanî bi serran dejê rejîmê BAASî ant. Ma vanê wa nê dejî hinda biqedîyê. Ma ewro sey bi se hezaran kurdan vejîyenê meydanan na roje pîroz kenê û mesajanê xo yê sîyasî û kulturkî danê.

 

Kurdî semedê pawitişê merdimîye û medenîyetî rolê serkêşî kay kenê. Hêzê mîyanneteweyî semedê qedînayîşê sîyasetê qirkerdişê vera kurdan gerek berpirsîyarîya xo bîyarê ca. Senî ke Newroze roja wayûbiratîye, haştîye û azadîye îfade kena, ewro Rojawan de bi mîlyonan ereb, kurd, tirl, armenî û asûrî sey dost û wayûbirayan yenê têhet. Ma nê demê kilmî de na ridnîya ke vîr ra şîya, vete werte. Ma gerek nika na roje bikerê roja haştîye. Hêvîya ma na ya, cehdkerdişê ma no yo.Ma hêvî kenê ke na serra newî do bêrê çareserîya sîyasîyî û haştîye abikero.”

 

Îlhame, dîyar kerd ke yê tewr zêde bi coşêk pîl Newroze pîroz kerdî cinî yê û dîyar kerdî ke cinî estbî û îradeyê xo manaya Newroze de vînenê.