Melîke Aydin

 

AYDIN - Cinîyan dîyar kerdî ke seba ke nêwazenê problemê kurdî bêro çareserkerdiş pêvînayîşê bi Rayberê PKKyî Abdullah Ocalanî asteng kenê û vatî ke ganî seba azadîya ci têkoşîn bêro dayîş.

 

Rayberê PKKyî Abdullah Ocalanî ke 24 serrî yo Îmrali de tepişte yo, binê tecrîdê girankerde de yeno tepiştiş û 2ê Adara 2021î ra nata ci ra xebere nîna girewtiş. Cinîyan dîyar kerdî ke ê Rayberê PKKyî Abdullah Ocalanî sey rayberê xo vînenê û azadîya ci wazenê. Cinîyan veng da ke ganî şarê Kurd yewîya xo awan bikera.

 

‘Cinî bi têgêrayîşê azadîya Kurde azad bî’ 

 

Cinîya bi nameyê Şîrîn Gozene ya 70 serrî da zanayîş ke 1992î de tedaya dewlete ya Colemêrgî vera ameya Aydinî û derheqê babete de wina vat: “Verê cû cinî azad nêbî. Dimayê têgêrayîşê azadîya Kurde cinî rehet bî. Verê cû ma nameyê xo nasnameyê xo nêzanayêne. Ma xeylê zor û zehmetîyan dî. Teda bi ma ameye kerdiş. Seba ke ma nêbîyî qorîcî îşkence bi ma ame kerdiş. Vatî şima terorîst ê. La ma reyna zî têkoşîn da.”

 

‘Ma azadîya Abdullah Ocalanî wazenê’

 

Şîrîne dewamê qiseykerdişê xo de bale ant tecrîdê serê Rayberê PKKyî Abdullah Ocalanî ser û wina qiseykerdişê xo peynî kerd: “Şarê Kurd Abdullah Ocalanî sey rayberê xo vîneno. Tu xebere nika ci ra nîna girewtiş. Her şar heqê ci yê azadîye esto. Ma wazenê ke Serekê ma serbest bêro verdayîş. Ma azadîya ci wazenê. Derdê ma azadîya Rayberê ma yo. Ma wazenê ke zîndan ra bêro vetiş.”

 

‘Seba azadîye bi hezaran kesî canê xo da’

 

Latîfe Turana 75 serrî zî dîyar kerd ke dewê Sêrtî seba qorîcîtî qebûl nêkerdê leşkeran keyeyê înan wêran kerdo û seba nê bajar bi bajar gêrayê û vat: “Pêwa her çî ma fek azadîye ra vera nêda. Kurdî heqê xo wazenê. Serê kurdan de zilm esto. bi hezaran kurdî seba azadîye canê xo feda kerdî.”

 

 ‘Dişminîyê bajaran zî dewam kerd’

 

Gulîstan Çevîk zî dîyar kerd ke dewê Şirnexî seba tedayê dewlete koç kerdê û wina vat: “Tu çîyêk sey wareyê merdiman şîrîn nîyo. Ma bêrîvanî kerdêne. Ma şîne serê erdanê xo. Ma her karî kerdêne. La ma bajarê ke bi ca bî ma rezilîyêk pîl ant. Tîya zî ma nêrehet ê. Tîya zî tedayî dewam kenê. Dewlete dişminî kena. Ma nêwazenê tu kes bimiro. Wa gonî nêrijîyo û seyyewbînîye bibo. Tu xebere Abdullah Ocalanî ra nîna girewtiş. Heme şarê dinya azadîya Ocalanî wazenê. Wa ganî azad bibo.”

 

Sabahat Aşkar zî bale ant serê tecrîdî û wina vat: “8 serrî verê ma keyeyê xo Şirnex de şer de vînî kerd. Seba nê ma koç kerd. Hemverê kurdan de polîtîkaya çinkerdişî yena rayraberdiş la şarê kurdî têkoşîn keno. Eke Kurdan xo ver nêdayîne çinbîne. Kurdan xoverdayîşî serekê xo ra musayî. Kurdî azadîya rayberê xo wazenê. Ganî kurdî bibê yew û serekê xo tecrîd ra xilas bikerê.”