Rojda Aydin - Dîlan Babat 

 

AMED - Cinîyê ke reaksîyon vera îktîdarî mojnayî dîyar kerdî ke îktîdar vera hetkarîye bido şarî, hêrişê Rojawanî keno û vatî: "Pereyê ke ameyî komkerdiş nêdayî mexdûrê erdlerzî. La ganî bêro zanayîş ke ma do seba mexdûrê erdlerzî paştdayîş mîyanê şaran de pîl bikerê."

 

6ê sibate de erdlerzê ke Mereş de virazîya û tesîr serê 11 bajaran de kerd. Tesîrê erdlerzî heta ewro zî dewam keno. Amed zî erdlerz ra tesîr bi. Mexdûriyetê şarî, bêtedbiriyê sazgeh û dezgehê dewlete û xemsarîyê îktîdarî bî sebebê reaksîyonan. 8ê Adare û Newroze de reaksîyonê şarî wareyan bi yew vengî ard ziwan. Newroza ke diyarî kesê ke erdlerz de dinyaya xo bedelnayî ame kerdiş, wareyan de hêrsê  mexdûrê erdlerzî zî berz bî. 

 

Welatijê ke tewrê pîrozbayîya Newroze ya Amedî bî ajansê ma rê qisey kerdî û bale antî serê rewşa bîyaye. 

 

‘Bi hêrişan şarê kurdî nêqedêno’

 

Laîhe Arşîmet, dîyar kerd ziwan ke seba kesê ke erdlerzî de xilas bîyê ganî seba înan cayêk biciwîyê bêro awankerdiş û vat: “Emser seba erdlerzî xemginîyêk esta. Pêwa xemgînî, ma reyna raşteyan de cayê xo girewt. La ma zanê ke bi wisarî reyde do aştî zî bibo. Ma wazenê şerê hemverê Rojawanî ganî peynî bibo. Bi serran o her tewir şer wazenê şarê kurdî çin bikerê. Labelê ganî bêro zanayîş ke şarê kurdî tu wext xelas nêbeno.”

 

‘Ma do paştdayîş girs bikerê’

 

Hatîce Ezer zî dîyar kerd ke ganî bi welatîyê erdlerzeyan reyde paştdayîş dewam bikero û wina vat: “Vera ke îqtîdar hetkarîya mexdûrê erdlerzî bikero hêrişê Rojawanî keno. Hîrê rojê destpêkî yê erdlerzî de merdimî binê xirbeyan de mendî. No edalet nîyo. Wîjdanê merdimî qîmê nê nêkeno. Rewşêka winasî de îqtîdar hêrişê Rojawanî kerd. Ma nê tu wext qebûl nêkenê. Seba welatijê erdlerzeyî hende pereyî ameyî arêdayîş la seba şer xerc kenê. La wa bizanê ma vera nê paştdayîşê xo girs kenê. Sewbîna bi şer nêeşkenê zorê Rojawanî berê. Bi şer û hem zî bi erdlerzî nêeşkenê şarê kurdî çin bikerê.” 

 

‘Şarî xo resna mexdûranê erdlerzî’

 

Emîne Bîlen, bi şermezarkerdişî hêrişê hemverê Vakur û Rojhelatê Sûrîye dest bi qiseykerdişê xo kerd û wina vat: “Ma zî mexdûrê erdlerzî yê. La reyna ma  bi mexdûrê erdlerzî reyde herêmanê bînan de kewtî paştdayîş. Labelê dewlete seba şarî tu çîyêk nêkerd. Kurdî û welatîyê zerrîwazî şî hawara mexdûrê erdlerzeyan. Sere de şarî xo resna mexdûranê erdlerzî. Welatijê ke pêro uca de ciwîyenê, hemwelatijê ma yê. Welatijê zerrîwazî ke hetkarî şirawitî, vernîya înan ame padayîş. Destûr nêame dayîş ke hetkarî şarî rê şêro. Vernîya hetkarîye padayî. Hende pere arêdayî, şarî rê nêerşawitî.”

 

‘Ganî şar êdî rastî bivîno’

 

Rindê Ateş zî dîyar kerd ke roja erdlerzî ra nata dewlete şar bêwayîr verdayo û vat: “Roja ewilî ya erdlerzî dewlete hêrişê Rojawanî kerd. Ma nê tu wext qebûl nêkenê. Dewlete tu hetkarîyêk şarê xo rê nêkerd. Na rewşe tu wext nêrê qebûlkerdiş. Wa şarê ma zî nê rastî bivîno û nê gore gama xo bierzo.”