Sema Çaglak

 

ŞIRNEX - Hemşaredara HDPyî ya Cizîrî ke qeyûm tayînê herinda aye ameybî kerdiş Berîvan Kutluye dîyar kerd ke wîjdan û exlaqê îqtîdarî erdlerzî de binê xirban de mend û vat: “Ma sey HDPyî serê esasê nuqtayê ke ma dîyar kerdî de aver şinê. Ma sîyasetê xo goreyê rayîrê 3ine û demokrasî rayra benê. Seba ma menfîetê şaran esas o.”

 

Erdlerzo ke 6ê Sibate de merkezê ci Mereş bî de qewimîya 11 bajaran girewt binê tesîrê xo rijnayîşêk gird nê bajaran de qewimîya. Hema zî birînê erdlerzî nêameyî piştiş û bi hezaran kesê ke xo binê xirban ra xelisnayî nika zî problemê cuye û şertan cuyenê. Îqtîdaro ke kesê ke binê xirban ra weş xelisîyayî rê nêbî cewab û nika nêeşkenê problemanê mexduranê erdlerzî çareser bikero. Sewbîna kişta problemê mexduranê erdlerzî ke dewam keno de weçînayîşêk ke do demêk kilm de bêro kerdiş zî rojeva şarî de yo û problemê mexduranê erdlerzî tesîrê xo serê prosesê weçînayîşî de zî keno. Partîyê sîyasî hadrekarîya weçînayîşî kenê. Maseya ke temsîlkarê 6 partîyan ser de ronişenê, seba xo Kemal Kiliçdaroguyî namzedê serekkomarî mojna. Partîya Demokratîke ya Şaran (HDP) zî bi tîfaqê Ked û Azadîye pêkerd. 

 

Derheqê problemê ke prosesê erdlerzî de ameyî cuyayîş û rojeva sîyasî de Hemşaredara HDPyî ya Cizîrî ya Şirnexî ke qeyûm tayînê herinda aye ameybî kerdiş Berîvan Kutluye qisey kerd. 

 

‘HDP karê xo yê wijdanî û exlaqî kerd’

 

Berîvane destpêkê qiseykerdişê xo de bale ant erdlerzê Mereşî ke 11 bajaran de tesîr viraştbî ser û wina vat: “Roja yewine ya erdlerzî de HDP kewt mîyanê têgêrayîşî. Roja yewine ya erdlerzî de HDP xebata xo vindarna û heme hêzê xo û endamanê xo şirawit herêma erdlerzî. HDP kare xo yê wijdanî û exlaqî pê ard. La îqtîdarî demêk winasî de zî hêrişê xo yê hemverê şarî domna. Seba ke sîyasetê HDPyî hetê wijdanî û exlaqî de aver nêşêro bi hêrişan hewl da ke nê sîyasetî çinî bikero. Prosesêk winasî de çîyo ke ganî bêro kerdiş cîyakerdîya mabenê şaran, netew û ziwanî nêbo. Îqtîdar na nuqta binpay kerd. Çi heyfo ke wijdan û exlaq bi destê îqtîdarî binê xirban de ame verdayîş.”

 

‘Qirkerdiş ame viraştiş’

 

Berîvane dewamê qiseykerdişê xo de da zanayîş ke herêma erdlerzî de qirkerdiş ame viraştiş û dewam kerd: “Îqtîdaro ke nê demî de zemînê binkewtişê xo hadre kerd, dest bi hêrişanê xo yê hemverê hetê muxalîfan kerd. La HDP hemverê nê heme hêrişan de xebata xo dewam kerd û vindertişê xo ra tavîz nêda. HDP mîyanê şarî de bî. Hemwelatijî bi fekê xo vatî ke sere de HDP û şar resa hawarîya înan. La sîstemo xetimîyaye bi zanayîş hemwelatijan binê xirban de verda. Herinda ke hetkarî bikero û bireso hawarîya şarî OHAL îlan kerd. Kesê ke şîyî hetkarîya şarî zî ameyî astengkerdiş, hêrişê înan kerdî û ameyî derbkerdiş. Yanî risîyayeyê xo domnayî. No dişmentîya hemverê şaran o. Tena dişmenîyêk hemverê şarê Kurdî de nîyo, hemverê heme şaranê Tirkîya de yo. Herêma erdlerzî de bi cuya merdiman kayî kay kerdî. Bi nê çîyî qirkerdişêk ame kerdiş. Ganî no çî vîrê ma ra nêşêro. Rojanê ewilan de nêşîyî hewarîya şarî. Eke lez bişîyayêne do hemwelatijî zêde weş xelas bibayêne. No nizdîbîyayîşê hemverê herêma erdlerzî ganî qet nêro vîrîkerdiş. Raştî zî gama ke kesê ke binkewenê, teng benê û hayîya înan bi binkewtişê înan ra beno hêrişê ke merdiman şaş verdenê pê anê. Ma nê prosesî de çîyêk winasî dî. Yê ke badê 10-15 rojan şîyî bi awa fêkîyan û kekan yê ke xo reyde berdbî yarîya xo bi şarî kerd. Her çend ke seba çîyê ke kerdî bahaneyan bivînê zî raştîya înan na ya.”

 

‘Gamê şênberî ferz ê’

 

Berîvane qala maseya 6ine zî kerd û dîyar kerd ke HDP do goreyê nuqtayê ke dîyar kerd sîyasetê xo rayra bero û vat: “Ma sîyasetê xo goreyê rayîrê 3ine û demokrasî rayra benê. Seba ma menfîetê şarî esas o. rewş û vindetişê ma dîyar o û ma nuqtayanê xo ra tavîz nêdanê. Maseya 6an gamê şênêber nêeşt. Xora ameyîş û şîyayîşê Meral Akşenere zî mojneno ke cîdîyetêk çin o. Sîyasetê aye sîyasetê xapênayîşî yo. Seba ma pratîkê vatişan esas o. HDP meclîs de partîya 3ine yo. HDP partîyêk şenik nîyo û weçînayîş de kîtle dîyar keno. Kam ke şertê HDPyî û talebe şarê Kurdî ca bîyaro ma do bi înan reyde masa de ronişê.”

 

‘Newroze cewabê hêrişê hemverê şaran a’

 

Berîvane qiseykerdişê xo yê peyênan de bale ant Newroze zî ser û wina qedênaye: “Yeno zanayîş ke Newroza emserrî dîyarîya kesê ke erdlerzî de dinyaya xo bedilnayî ame kerdiş. Hem 8ê Adare hem zî Newroze de babeta ma ya yewine erdlerz bî. Newroze roşan û têkoşînê şaran a û cewabê hêrişanê hemverê şarî ya.”