Sema Caglak

 

MÊRDÎN - Hemverfeka Partîya Çep a Keske ya Nisêbînî Nergîz Akyuze da zanayîş ke partîya înan seba heme şaran umud a û wina vat: “Demêk kilm de seba partîya ma wayîrvejîyayîşêk gird virazîya. Partîya ma umud dana û ma do ser bikewê.”

 

Partîya Demokratîke ya Şaran (HDP) hemverê tehlukeyê girewtişî de qerar da ke Partîya Çep a Keske reyde dekewa Weçînayîşê Pêroyî yê 14ê Gulane. Partîyê sîyasî yê Tîfaqê Ked û Azadîye ke kişta HDPyî de ca girewtî têgêrayîşê xo eşkera mojnayî û dîyar kerdî ke do Partîya Çep a Keske reyde ê zî dekewê weçînayîş û do namzedê Serekkomarî dîyar nêkerê. Partîya Çep a Keske zî seba ke xo weçînayîşî rê hadre bikera demêk kilm de xo bi rexistin kerd û kongreye xo pê ard. 

 

Hemverfeka Partîya Çep a Keske ya Nisêbînî ya Mêrdînî Nergîz Akyuze derheqê prosesî de ercnayîşanê xo ajansê ma rê kerd.

‘Wayîr vejîyayîşêke gird virazîya’

 

Nergîze qiseykerdişê xo de da zanayîş ke Partîya Çep a Keske hem Kurdîstan hem zî Tirkîya de hêzê xo her ke şina gird kena û vat: “29ê Çeleyî de ma kongreye xo yê Nisêbînî pê ard. Serrê derg û dilayî ke hemverê HDPyî de hêriş û tedaye dewam keno. Hewl dane ke vengê HDPyî bibirnê. Ne meclîs û ne zî raşteyan de nêwazenê ke vengê HDPyî bivejîyo. La HDP vera nê hêriş û tedayan de her raşteyî de seba şarî umudêk awan kerd. Nika zî Partîya Çep a Keske seba eynî amacî şarî rê bî umudêk gird. Bi taybetî zî hetê ciwanan de wayîrvejîyayîşêk gird virazîya û nameyê ci vila kerd. Xeylê hemwelatijê ke ma xo nêresna înan keyeyanê xo ra vejîyayî û wayîrê Partîya Çep a Keske vejîya. Ma zî wayîrvejîyayîşê şarî ra moral girewt. Rêxistina ma ya Nisêbînî bi taybetî ciwanan ra pê yena. No zî hêzê ma hîna zêde keno û seba ma beno moral.” 

 

‘Newroze seba peynîkerdişê tecrîdî bî vindertişêk’

 

Nergîze dewamê qiseykerdişê xo de bale ant mesajê ke Newroze de raşteyan de ameyî dayîş ser û dîyar kerd ke Newroza emserî xerîtaya prosesî dîyar kerd. Nergîze wina dewam kerd: “Hêz û qerardarîya şarî yê raşteyê Newroze seba heme şaran bawerî û umudêk da. Nê mesajî hêz da ma. Dewleta Tirke her reya ke vana şarê kurdî de hal nêmendo, şarê kurd her Newroze de nê vatişî beng vejeno. Newroza emserî de zî xeylê mesajê muhîmî ameyî dayîş. Tewr zêde hetê ciwan û dayîkan ra mesaj ameyî. Bi taybetî Newroza emserî de ciwanî wayîrê vindertişêk xoverdayox mojna û bi taybetî zî serê azadîya Rayberê PKKyî Abdullah Ocalanî de vindertî. Şima zî zanê ke 2 serrî yo birêz Ocalanî ra tu xeberêk nîna girewtiş. Ne bi avûkatanê xo reyde û ne zî keyeyê xo reyde nêeşkeno pêvînayîş pê bîyaro. Yanî binpaykerdişê huqûqî merheleyêka cor de yo. No zî şarê Kurdî keno mîyanê şikî. Newroza emserî de seba peynîkerdişê nê tecrîdî vindertişêk xurt estbî. Sewbîna Newroze de hêrsê şarî xeylê zêde bî. Çike şar êdî eno îqtîdarî nêwazeno. Şar Newroze de mojna ke do eno weçînayîşî de îqtîdarî ra hesab bipersê û reaksîyonê xo yê hemverê sindoqan mojna.”

 

‘Ma bawerî û ma do ser bikewî’

 

Nergîze tewr peynî derheqê taybetîyanê Partîya Çep a Keske de qisey kerd û wina vat: “Partîya Çep a Keske mîyanê xo de xeylê babetanê muhîman hewênena. Sey wayîrvejîyayîşê heqanê cinîyan, pawitişê ekolojîye û seba pawitişê edaletî xebata xo rayra bena. Ercêk zêde dana ciwanan. No 20 serrî yo ke bi destê îqtîdarê AKPyî xeyal û ameyoxê ciwanan ameyo çinkerdiş. Coka ra ma bawerê ke Partîya Çep a Keske do xeyalê ciwanan newe ra ganî bikera. Ma bawer ê û ma do ser bikewê.”