STENBOL - Avûkatanê Buroyê Huqûqî yê Asrînî seba pêvînayîşê bi miwekîlê xo Rayberê PKKyî Abdullah Ocalanî ke 2 serrî zêdeyêr o tu xebere nîna girewtiş, muracatê Serdozgerîya Komare ya Bursayî û Mudûrîyê Zîndanî Îmraliyî kerd.

 

Avûkatanê Buroyê Huqûqî yê Seserre ra Îbrahîm Bîlmez, Raziye Ozturk, Emran Emekçî û Cengîz Yureklî seba pêvînayîşê bi Rayberê PKKyî Abdullah Ocalan ke Zîndanê Qefilnayeyê Tîpê Fyî bi Asayîşê Berzî yê Îmraliyî de yeno tepiştiş, Serdozgeriya Komare ya Bursayî û Midûrîyê Zîndanê Îmralî muracat kerd. Heto bîn ra avûkatan, seba pêvînayîşê bi Omer Hayrî Konar, Hamîlî Yildirim û Veysî Aktaş zî hem muracatê dozgerî û hem zî midûrîyê zîndanî kerdî. 

 

Astengkerdişê pêvînayîşan

 

Avûkatanê Rayberê PKKyî Abdullah Ocalanî hewte ra di rey seba pêvînayîşî muracat kenê labelê ne pozîtîf û ne zî negatîf  tu cewab nêame dayîş nê reyde 22yê Teşrîna Peyêne serra 2021ine de bi waştişê, “muracatê lezgîn” muracatê Dadgerîya înfazkerdişê Cezaye ya Bursayî kerdî. Dadgerîye bi bahaneyê qedexeyê pêvînayîşê bi avûkatan reyde yê seba 6 aşman ke 12ê Teşrîna Verêne 2021ine de amebi dayîş û qedexeyê pêvînayîşê bi keyeyî reyde seba 3 aşman ke 18ê tebaxa 2021ine de amebi dayîş, muracatê avûkatan red kerd. Labelê derheqê sebebê qedexeyê avûkatan nêame agahdarkerdiş.

 

Qedexeyê pêvînayîşî bi keyeyî reyde

 

Qedexeyê pêvînayîşê bi keyeyî reyde 18ê Teşrîna Peyêne serra 2021ine de peynî bi. Pêwa nê zî Serdozgerîya Komare ya Bursayî tu cewab nêdayî muracatê seba pêvînayîşê bi keyeyî reyde. Avûkatan 28ê adare de reyna muracatê Dadgerîya Înfazkerdişê Cezayan ê Bursayî kerd. Avûkatan waşt ke heme astengîyê vernîya pêvînayîşê bi keyeyî reyde bêrê wedaritiş û pêvînayîşî bi ca bêrê. Dadgerîye 29ê adare de cewab da muracat û muracat reyna red kerd. Dadgerîye sebebê redkerdişî de dîyar kerd ke cezayê newe yê disiplînî Abdullah Ocalanî rê ameyê birnayîş û dîyar kerd ke bi nê sebebî do destûrê pêvînayîşî nêro dayîş. Qerarê xo yê redkerdişî de dadgerîye wina vat: "Serekîya Heyetê Disiplînî yê Îmraliyî 3yê sibata 2022ine de seba pêro muracatan heta 3 aşmî qerarê qedexeyê pêvînayîşê bi keyeyî reyde dayo û no qerar 21ê sibate de qetî bîyo. Coka zî no muracat ameyo redkerdiş."

 

Muracatê AYMyî kerdî

 

Avûkatanê Abdullah Ocalanî dimayê qerarê redkerdişî yê dadgerîye, 12 Adare de bi sebebê ke pêvînayîşê keyeyî bi rayîrê cezayanê disiplînan ê “bêhuqûqî” yenê astengkerdiş, muracatê Dadgeha Destûrê Bingehîn (AYM) kerdî. Muracat de avûkatan bale ant serê rewşa agahînnêgirewtişê mutleq (incommunicado) û vatî ke rewşa agahînêgirewtişî metodêk îşkenceyî yo û waşt ke AYM tespîtê binpaykerdişê heqan rêzgirewtişê hemverê cuya taybet, heqê pawitiş û muhakemekerdişê adilane û heqê rayîrê muracatêk bibandor bikero.

 

Cezayê dîsîplînî yê fîîlî dewam kenê

 

Qerarê qedexeyê pêvînayîşê bi keyeyan reyde seba cezaya disiplînî yê 3yê sibate de amebi dayîş, 7ê hezîrane de peynî bi. Nê ser de avûkatanê Ocalanî muracatê Dadgerîya Înfazkerdişê Cezayan ê Bursayî kerdî. Avûkatan muracatê xo de dîyar kerdî ke demê cezaya disiplînî peynî bîyo coka zî ganî pêro astengîyê vernîya pêvînayîşî bi keyeyî reyde bêrê wedaritiş û eke cezayê newe yê disiplînî bibê zî ganî na babete de bêrê agahdarkerdiş. Dadgerîye rojêke dima cewab da muracatê avûkatan û vat ke cezayê disiplînî hema zî bi hawayêke fiîlî dewam kenê û bi nê bahaneyî muracatê avûkatan red kerd.

 

Serê redkerdişê muracatî, avûkatan 15ê hezîrane de 1ine Dadgeha Cezaya Giran ê Bursayî de îtîraz kerd.

 

Dadgehe 23yê hezîrane de cewabê îtîrazî da. Cewab de dadgehe dîyar kerd ke Serekîya Heyetê Disiplînî yê Zîndanê Îmraliyî 31ê gulane de Abdullah Ocalan û tepişteyê bînî cezaya displînî yê seba 3 aşman birnaya û îtîraz red kerd.

 

Qedexeyê pêvînayîşî yê bi avûkatan reyde

 

Dadgerîya Înfazkerdişê Cezayan ê Bursayî 12ê Teşrîna Verêne serra 2021ine de cezaya qedexeya pêvînayîşî bi avûkatan ê seba 6 aşman dabî Abdullah Ocalanî. Qedexeyê pêvînayîşî 22yê Nîsane de peynî bibi. La reyna zî destûr nêame dayîş ke avûkatî bi muwekîlê xo reyde pêvînayîş bikerê. Pêroyî muracatê avûkatan ê seba pêvînayîşî zî bêcewab ameyî verdayîş. Nê ser de avûkatan 29ê Nîsane de reyna muracatê Dadgerîya Înfazkerdişê Cezayan ê Bursayî kerdî. Dadgerîye eynî roje de cewab da û waştişê pêvînayîşî reyna red kerd. “Bahaneyê" redkerdişê waştişê pêvînayîşî de ame dîyarkerdiş ke dadgerî 13ê Nîsane de seba 6 aşman qerarê qedexeyê pêvînayîşî dayo. Derheqê bahaneyê qedexeyî de reyna tu zanayîş bi avûkatan reyde nêame parekerdiş.

 

Pêvînayîşê serê telefonî birnayî

 

Abdullah Ocalan reya ewil 27ê Nîsana serra 2020ine de eşka heqê xo yê pêvînayîşî serê telefonî ra feyde bigîro. Dimayê ke derheqê Abdullah Ocalanî de serê medyaya dîjîtale de agahî ameyî parekerdiş, reaksîyonê rayaumumî zêde bî. Bi pîlbîyayîşê reaksîyonan reyde Abdullah Ocalan 25ê Adara 2021ine de bi birayê xo Mehmet Ocalan reyde serê telefonî de qisey kerd. Labelê Mehmet Ocalan da zanayîş ke pêvînayîşê înan nîme de ameyo birnayîş.

 

Avûkatanê Abdullah Ocalanî ra Rezan Sarica û Nevroz Uysal dimayê 8 serran, tewr peyîn 2-22yê Gulane, 12-18ê Hezîrane û 7ê Tebaxa serra 2019ine de eşkayî bi muwekîlê xo reyde pêvînayîş bikerê. A roje ra heta nika zî destûrê pêvînayîşî nîno dayîş.

 

AYMyî fikr waşt

 

Mîyanê 8 serran de Buroyê Huqûqî yê Seserre xeylêk rey muracatê Dadgeha Destûrê Bingehîn (AYM) kerd. Seba 23 muracatê buroyî,  AYMyî Wezaretê Edaletî ra fikr waşt. Qedexeyê pêvînayîşê avûkatan û keyeyan heta qedexeyê cezayê disiplînî û telefon û qedexeyê wextê OHALî de Îmraliyî de ameyî caardiş, xeylêk babetan de fikr bi AYMyî reyde pare kerd.

 

Wezaretî 24ê adare de derheqê astengkerdişê pêvînayîşê avûkat û keyeyî AYMyî rê fikr pêşkeş kerd. Wezaretî vat, “Îmraliyî de muameleyê xirab çin o" û îdia kerd ke “pêvînayîş seba kêmîyê ke vejênê, pêvînayîş nîno kerdiş" û na rewşe zî sey rewşêka “maqûl” ercna.

 

Qerarê DMMEyî ame binpaykerdiş

 

Wezareta Edaletî derheqê astengkerdişê pêvînayîşê dimayê  OHALî Îmraliyî de yenê kerdiş, bi AYMyî reyde fikr pare kerd û na rey zî argumanê qerarê, “Ocalan No.2” yê hukmetî sey “Tespîtê DMMEyî” pêşkeş kerd. Avûkatan zî da zanayîş ke wezaret seba meşrûkerdişê tecrîdî qerarê DMMEyî tehrîf keno.