ŞENGAL - Cinîyê ke tewrê pîrozkerdişê Çarşema Serê Nîsane bîyî vatî: "Hêvî û waştişê ma no yo ke her kes agêro serê herra xo ya pîroz û pîya roşanê xo pîroz bikerê." 

 

Çarşema Serê Nîsane yanî awanbîyayîşê dinyaye, Gelîyê Kersî yê Şengalî de bi şahîyêke ame pîrozkerdiş. Şahî bi sloganê "Bi yewîya êzidîyan û bi ruhê Çarşema Serê Nîsane ma do xoserîya Şengalî awan bikerê" ame berzkerdiş. Raşteyê şahîye bi rengê cinîyan heyvê nîsane û rengînîya ci hîna zêde kerdêne. Heme cinîyî bi kince xo yê herêmî tewrê şahîye bîyê. 

 

Şahîye de serê nameyê Rayîrberîyê Xoser ê Şengalî qiseykerdişêk ame kerdiş û hetê Keyeyê Êzidîyê Rojawanî ra mesajêk ame weşanayîş û mesajê cîya zî est bî. Mesajan de Roja Çarşema Nîsane heme êzidî û dinya rê ame pîrozkerdiş. Eynî wextî de keyeyê şehîdan, şervanê serê koyan Rayberê PKKyî Abdullah Ocalanî rê ame pîroz kerdiş. Seba serra newîye hêvîya aştî û asayîşî ame waştiş. 

 

Dimayê qiseykerdiş û mesajan grubê kultur û hunerî vejîyayê serê sahne û hunerê xo bi deyîr, govend û tîyatroyî pêşkêş kerdî. 

 

‘Ma nê roşanî azadîwaştoxan rê pîroz kenê’ 

 

Endama Kordînasyonê Têgêrayîşê Azadîya Cinîyê Êzidî (TAJÊ) Neam Bedele ajansê ma rê qisey kerd û wina hîsê xo yê derheqê roşanî de ard ziwan: “Ma sere de Roşanê Serê Nîsane, roşanê awanbîyayîşê dinya serekê xo rê pîroz kenê. Tepişteyê zîndanan, esîrê destê çeteyan, keyeyê şehîdan û pêro merdimîye rê pîroz kenê. Ma roşanê gerîlayan, partîya karkerê Kurdistanî û partîya azadîya cinîyê Kurdistanî pîroz kenê. Heme kesê ke seba azadîye cuye kenê û têkoşîn kenê rê pîroz bo. Goreyê serranê verênan emser zaf coşêk pîl şahîye de est o û roşan de coş pîl bî, bi kêfweşî çar hetê Şengalî ra şar ame pîrozbayî. Bi hêvîya ke her serre bi xêr û weşî ma pîroz bikerê. Bi hêvîya ke yewna serre serekê ma, tepişteyê zîndanan û esîrê ma tîya de bê û ma pîya roşanê xo pîroz bikerê. Reyna ma nê roşanî heme êzidîyan û merdimîye rê pîroz kenê.” 

 

‘Wa her kes agêro Şengal’ 

 

Rîhan Şingalî yew dayîkê ke tewrê şahîya pîrozkerdişî bîbî ya û hîsê xo bi nê çekuyan ard ziwan: “Ma roşanê heme êzidîyan pîroz kenê. Hêvî û waştişê ma no yo ke wa her kes agêro serê herra xo ya pîroz û pîya roşanê xo ya pîroz, pîroz bikerê. Ma agêrayê. Agêrayîşê xo ra ma zaf kêfweş ê. Ma wazenê ke şarê ma yo ke başûrê Kurdistanî ciwîyeno wa agêrê serê herra xo. Ewro zî şahîyêke xeylê weş û bi coş est bî. Bi hêvîya ke heme rojê ma wina derbaz bibo. Ancî ma roşanê her kesî û bi taybetî yê ezidiyan pîroz kenê.”