WAN - Rayîrşîyayîşê "Îradeyî rê rêzgirewtiş" ke hemverê qeyûmî de desteserkerdişê îradeyî ameyo destpêkerdiş, roja xo ya 7ine de dewam keno. Hemsereka Pêroyî ya SYKPî Feray Mertoglu vat, “Qeyûm netîceyê nêçareserkerdişê problemê kurdî bi rayîrê demokratîke yo. Ganî tu kes hemverê desteserkerdişê îradeyî de bêveng nêmanê."  

 

“Rayîrşîyayîşê rêzgirewtişê îradeyî rê ” ke hemverê tayînkerdişê qeyûmî Şaredarîya Colemêrgî ya binê îdareyê Partîya Demokrasî û Têduştîye (DEM Partî)  roja xo ya 7ine de dewam keno. 350 kesê ke mîyan de Hemserekê DBP Keskîn Bayindir, parlamenter, hemşaredar û temsîlkarê sazgehê sivîlî zî est ê, qezaya Elbakî ya Wanî de şewa xo derbaz kerdî. Rayîrwanî saetê serê sibayî de ameyî têhet û dima ra merkezê  bajarî ra heta serê rayîrê Colemêrgî rayîr ra şîyî. Raywanî bi sloganê "Jin, jiyan, azadî", "Colemêrg ya me ye", "Bijî berxwedana zindanan", "Roj wê were, wê AKP hesab bide gel" heta merkezê qeza rayîr ra şîyî û dimayê ke bi qasê 4 kîlometre rayîr ra şîyî eşkerayîye dayî çapemenîye.

 

'Ganî tu kes hemverê qeyûman bêveng nêmano'

 

Hemsereka Pêroyî ya Partîya Sosyalîst Newe ra Xelisyayîşî (SYKP) Feray Mertoglu ke verê pankartê "Ji îradeyê re rêzgiritn ji qeyûm re na" eşkerayî da vat, "Pêwa pêro astengiyan ma rayîrşîyayîşê xo dewam kenê. AKP-MHPyî polîtîkaya pelçiqnayîşî serê kurdan û şaran de keno û heqê kurdan ê raydayîş û weçînayîşî 3 rey ameyo desteserkerdiş. Qeyûmê ke tayînê Kurdistanî yenê kerdiş, netîceya çaresernêkerdişê problemê kurdî bi rayîrê demokratîke yo. Sere de pêro rayaumûmî, şorişgêr û muxalefet pêro kesê ke na rewşe ra bêzar benê, wa bêveng nêmanê. Eke ma hemberê nê de bêveng bimanê do cinî keyeyê xo de bêrê hepiskerdiş, karkerî bêkar bimanê, xoza zî do wêran bibo. "

 

'No eynî wextî de rayîrşîyayîşê azadîya cinî yo'

 

Feraye dîyar kerd ke semedê mîyanê şert û mercê têduştî û azad de biciwîyê, ganî her kes paştdayîş bido rayîrşîyayîş û vat, “No rayîrşîyayîşê azadîye, eynî wextî de rayîrşîyayîşê azadîya cinî yo û hemverê caardişê demokratîke yo. Ma sipasîyê xo her kesê ke ma reyde rayîr ra şîyî, keyeyê xo akerdî û nê rayîr ra şîyayîşî de paştî dayî ma sipas kenê.”

 

Dimayê qiseykerdişan raywanan rayîrşîyayîşê xo yê ver bi sînorê Colemêrgî de dewam kerdî.