STENBOL - Dadgeha Berzî, hukmê bi sebebê setê kitaban ê bi nameyê "Çareserîya Şaristanîyê Demokratîke" ê Abdullah Ocalanî xira kerdibî û muhakemekerdiş newe ra dest pêkerdibî. Muhakemekerdişê newe de qerarê beraetî ame dayîş. 

 

Daîreyê Cezaya 3ine ê Dadgeha Berzî, cezaya bi sebebê setê kitaban ê bi nameyê "Çareserîya Şaristanîyê Demokratîke" ê Rayberê PKKyî Abdullah Ocalanî amebî birnayîş xira kerd. Semedê nê serra 2015ine de awankerdoxê Weşanxaneyê Aramî Ridvan Saîn ke setê kitaban çap kerdibî, cipersayîş ame destpêkerdiş. Cipersayîş dimayê demêk açarya dewa. 

 

Goreyê xebera Ajansê Mezopotamyaye (MA) îdianameyî de ameyo dîyarkerdiş ke vatişê sey "şerê şarî yê şorişgêrî" û "hîkayeyê lehengî" yê pawitnameyî de methê PKKyî kenê, ame dîyarkerdiş ke beşê derheqê çareserîya meseleya kurdî de talîmatê amadekarîya şerî ameyo dayîş û bi no hawayî metod û çalakîyê PKKyî ameyê meşrûkerdiş. Îdianameyî de ame dîyarkerdiş ke berpirsiyarîyê Saîn o û nê semedî ra ame waştiş ke bi îdiayê "propagandayê rêxistine" ceza Saîn bêro girewtiş. 

 

Saîn: Kitab bi bandor o û legal o

 

Saîn, pawitişê xo de dîyar kerd gama ke kitab çap kerdê tu qerarêk arêdayîşî çinî bîyo û kitab bi bandorl o û legal o. 

 

Dadgeha Cezaya Giran ya 14ine ê Stenbolî zî bi îdiayê "propagandayê rêxistine" 2 serrî û 6 aşmî ceza Saînî rê birna. Dadgeha Îstinafî zî qerarê Dadgeha Cezaya Giran tesdîq kerd. 

 

Qerar ame xirakerdiş

 

Dimayê nê Saînî muracatê Dadgeha Berzî kerd. Daîreyê Cezaya 3ine ê Dadgeha Berzî zî qerar xira kerd. Dadgeha Berzî qerarê xo de dîyar kerd ke çîyo ke rayîr û metodê rêxistinî meşrû bikero ci de çin o û qerarê ameyo dayîş "hemverê huqûqî" yo." Dadgeha Cezaya giran zî dimayê qerarê Dadgeha Berzî, qerarê beraetî da.