Mîdye Miqted

 

HELEB - Hemsereka Malbenda Helebî ya Roşnvîrî Leyla Xalid, dîyar kerd ke hemverê întîxarê cinîyan do taxe de rêxistinbîyayîşê cinîyan xurt bikerê û xo biresnê pêro cinîyan. 

 

Derheqê întîxarî cinîyan de taxa Şêxmeqsûda Helebî de, hetê Ofîsê Cinîyan ê Têgêrayîşê Komelê Demokratike de komxebatêk ame orgenîzekerdiş. Komxebate de xeylêk babetî  ameyî dest girewtiş û rayîrê çareserî ame munaqeşekerdiş. 

 

Derheqê komxebate de û babetê ke ameyê munaqeşekerdiş de Hemsereka Malbenda Helebî ya Roşnvîr Leyla Xalid ajansê ma rê qisey kerd.

 

Şer de problemê cinîyan

 

Leyla wina qalê rewşa cinîyan kerd: "Ewro ma sey roşnvîrê Helebî ma na babete girewte dest. Semedo ke cayêk de şer û alozî biqewîmîyo uca de xeylêk problemê komelî zî virazênê. Yew înan ra zî ewro nê taxan de întîxar o. Ma zî dimayê ke sosyolojîya azadî wend ma projeyêk amade kerd. Ma mîyanê hîrê aşman de xo problemanê komelî reyde meşgul bikerê.”

 

Fikrê komelî gênê

 

Leyla dewam de wina vat: "Mîyanê taxe de xeylê rêxistinê ma ameyê awankerdiş. Bi taybetî rêxistinê cinî yê sey Kongra Star, Keyeyê Cinî, Weqfê Cinîya Azad û Rêxistina Sara. La ancî zî hîn taxan de întîxarê cinîyan pê yenê. Ma fikrîyenê ke senî vernîya nê çî padê. Na babete pêro sazgeh û taxe reyde yena munaqeşekerdiş. Ma fikrê komelî zî gênê.”

 

'Ma do xo biresnê pêro cinîyan'

 

Leyla bale ant serê berpirsîyarî û wina qedêna: "Wezîfeyo tewr muhîm keweno ser milê ma. Ma do xo bi rêxistinkerdişê cinî reyde eleqedar bikerê ke ma nêverdê ke cinî hemverê problemê cuye de xo nêresnê sewîyeya întîxarî. Hemverê întîxarê cinîyan de wezîfeyê ma yo tewr girîng zî xo resnayîşê pêro cinîyan o.”