WAN - Parlamenterê DEM Partîye hêrişê Tirkîya yê bi hemkarîya PDKyî hemverê başûrê Kurdistanî de yeno kerdiş, qisey kerdî û dîyar kerdî ke ganî kurdî nê polîtîkayan ra vajê êdî bes o.

 

Tirkîya 3yê hezîrane ra dima semedê başûrê Kurdistanî sewqîyatê leşkerî kena û bi hemkarîya PDKyî hêrişê hemverê başûrê Kurdistanî dewam kena. Parlamentera Partîya Têduştîye û Demokrasî (DEM Partî) yê Agirî Nejla Demîr û Parlamentera Mûşî Summeye Boz dîyar kerd ke ganî pêro kurdî nê polîtîkayan ra vajê êdî bes o.

 

Parlamentera DEM Partî Nejla Demîr da zanayîş ke serranê 90î de bi mîlyonan kesî wareyê xo ra ameyê kerdiş û ewro zî bi polîtîkayê AKP-MHPyî hemverê şarê kurdî de hêrişî pê yenê.

 

Şarê kurdî nê qebûl nêkeno 

 

Nejla da zanayîş ke PDK bi serran o bi hemkarîya AKP-MHPyî hêrişan keno û hewl dano tifaq bikero. Nejla wina vat: “Serê dişminîyê hemverê kurdan koalîsyonêk babeta vatişî ya. Tirkîya hemverê herra Başûrî operayson kena û PDKyî reyde tifaq kena. Bi hemkarîya PDKyî kena. PDK bi serran o AKPyî reyde nê hemkarî keno. La şarê kurdî nê çî qebûl nêkeno. Hemverê nê de têkoşîn keno. Têkoşînê bi rumetê şarê kurdî do nê têkilîyan birijno.”

 

‘Do hesab bidê şarê kurdî’

 

Nejla da zanayîş ke têkilîyê PDK û îqtîdarî tifaqêk rant û şer o û wina vat: “Heta nika herêma Federal a Kurdistanî de 300ê zêdeyêr dewî ameyî vengkerdiş. Xoza ameya talankerdiş. Şarê uca ameyo koçberkerdiş. Qerekolî ameyê awankerdiş. Çimeyî pêşkêşê şîrketanê tirkan yenê kerdiş. Prosesêk şerê newe ameyo desptêkerdiş. La do hesabê nê hêrişan bidê şarê kurdî. Ma do nê şerî veng vejê. Yê ke tewr zêde şerî ra tesîr benê cinî û tut ê. Ma nê sîstemî bi xoverdayîş û têkoşînê xo bivurnê. Ganî şarê kurdî dorê yewîya neteweyî de hemverê nê hemkarîya PDKyî de bibê yew. Ganî tu kes bêveng nêmano û xo ver bido.”

 

‘PDKyî şuxilnenê’ 

 

Parlamentera DEM Partîye ya Mûşî Sumeyye Boz zî wina vat: “Ganî rejîmê şerî polîtîkayê şerî baş bêrê vînayîş. Hemverê kurdan de polîtîkayêke zextî yena caardiş. Bakur û Başûr de eynî nimûneyî vejênê werte. Rojawan de hemverê kurdan de hêriş û mudaxale est ê. Her çar parçeyê Kurdistanî de şer yeno kerdiş. PDKyî semedê berjewendîyê xo şuxilnenê. PDKyî girêdayeyê xo kerdê. Tirkîya artêşa xo Iraq de bica kerda. Xeylêk dewî ameyê vengkerdiş. Xeylêk kesî ameyê koçberkerdiş. Ma do netîceya na roje wextê bêro de eşkera bikerê.”