WAN - Temsîlkara serekîya Pêroyî ya PÎA Menîce Gulmez derheqê hemkarîya Tirkîya û PDKyî û amancê hêrişê neweyî de qisey kerd û vat: “Fatureyê nêîdarekerdişê welatî, kurdan rê yeno birnayîş. Ez venga pêro hetê hîsgêr kena ke wa vernîya polîtîkaya ke kurdan yewbînan rê danê şikinayîş, bigîrê.”

 

Tirkîya semedê cakerdişî sewqîyatê leşkerî yê semedê herêma Başurê Kurdistanî dewam kena û hemverê hemkarîya PDKyî yê Tirkîya reyde reaksîyonî dewam kenê. PDKyî bi hemkarîya xo ya Tirkîya reyde paştdayîşê xo zî paştrast kerd. No helwestê hemkarîye yê PDKyî eynî wextî de sey hêrişêk hemverê destkewtişê kurdan û yewîya netewî zî yena ercnayîş.

 

‘Her tim mudaxalekerdiş’

 

Temsîlkara serekîya Pêroyî ya Partîya Merdim û Azadîye (PÎA) Menîce Gulmez reaksîyon hemverê qerarê tesdîqkerdişê sewqîyatê leşkerî yê PDKyî mojna û ajansê ma rê ercnayîş kerd.

 

Menîce da zanayîş ke Tirkîya tarîx ra heta nika hemverê herra kurdan de îşxalkerdiş kena û wina vat: “Wextê komare ra heta nika, Tirkîya hewl dana herra Kurdistanî, herra Başurê Kurdistanî, yê Rojawanî bikera binê kontrolê xo û tedayan kurdan rê kena. No wextê komare ra babeta vatişî ya.”

 

‘Şarê kurdî anê rî bi rî’

 

Menîce vat îqtîdar PKK kerdo bahane û dest bi hêrişan kerdo û wina vat: “Bi teyareyê hewayî yê bê merdim, bi çek, û hêzê leşkerî herême de ca keno. Amancê hêrişan oyo ke kurdan werte ra wedarnê. Wazenê kurdan yewbînan rê bidê şikinayîş û qels bikerê.”

 

‘Fatureyê ci kurdan rê birnenê’

 

Menîce wina qedêna: ”Mabêne PDK û Tirkîya de peymane bibo ganî dinya, rayaumûmî yê mîyannetweyî lezkî muxataban reyde pêvînayîş bikero. Wa kes nêmiro. Hukmat faturayê nêîdarekerdişî xo kurdan rê birneno. Bi şer û hêrişan hewl danê xo serkewte bimojnê rayaumûmî. Ganî pêro rayaumûmî hemverê nê hêrişan de hişyar bibê û bi hîsgêr têbigêrê.”