![](/staticfiles/news/238266/2024/07/27/823x463cc-ist-27-07-24-midyecilik-yapan-hamide-acar-manset.jpg)
Ameyî koçberkerdiş, bîyî tutê karkerî, 33 serrî yo mîdye roşena
- 11:18 27 Temmuze 2024
- NAROJANE
STENBOL - Hamdîye Acar ke emrê qijî de keyeyê aye ame koçberkerdiş û emrê qijî de dest bi xebate kerd, 33 serrî yo mîdye roşena. Hamdîye wina vat: “Ma hende kede danê, kes keda ma nêvîneno. Semedê nê ganî cinî yewbînan reyde bibê hêz.”
Netîceyê polîtîka şerê taybetî de bi hezaran kurdî herra xo ra bî û ameyî koçberkerdiş. Nê koçberî reyde emrê qijî de xebate, feqîrî, zor û zehmetî û binpaykerdişî zî vejîyayî werte. Yew cayê ke kurdî ca bî, taxa Tarlabaşi ya Stenbolî ya. Kesê ke uca de newe ra cuye awan kerdî û nînan ra yew zî karê mîdye ya. Hamdiye Acare zî nê karî kena. Hamdiye derheqê zor û zehmetîyê kar û cuya xo de ajansê ma rê qisey kerd.
Tedayê dewlete reyde sûrgunêk newe…
Hamdîye ke Mêrdîn de yena dinya, 6 serrîya xo de keyeyê aye semedê tedayê dewlete koçberî Stenbolî beno. Hamdîye wina vat: “Dewlete paştdatîş nêda ma. Nê semedî ra ma nêeşkayîne debara xo bikerdêne. Dewlete nêwaşt ma tîya bimanê. Dewa ma talan kerdî. Nêverdayîne na heywanan biçêrênê. Ma 1999ine de ameyî Stenbol. Tîya tirkî est bî, tehemulê kurdan nêkerdêne. Kar nêdayîne ma. Ez 7 serrî bîya, ma karê mîdye kerdêne. Nika 40 serrî ya.”
‘Emrê qijî de zewac’
Hamdîye vat 17 serrîya xo de zewicyaya û wina vat: “Ez zewicyaya û ameya Mêrdîn. Dimayê serran ma ancî peyser şî Stenbol. Ma karê mîdye dewam kerd. Ez gama ke zewicyaya, qije bîya. Ez hem keye de şuxilêna, hem karê mîdye kena. Pêwa nê keda cinîyan nîna vînayîş. Karê mîdye zehmet o. Merdimî eşkenê bi enfeksyon bikewê. Boya ci merdimî aciz kena. Ma serê sibayî saete 6ine de wurzenê û 6-7 saetan şuxilênê. Ma yenê keye, na rey zî karê keyeyî kenê. Ganî cinî paştdayîş bidê yewbînan.”
'6 sewîyeya ra derbaz bena'
Hamdîye vat, amadekerdiş de 6 sewîya ra derbaz bena û wina vat: “Qezencê ma tay nîyo la goreyê ekonomî qîm nêkeno. Ma çiqas qezenc bikerê zî ma nêeşkenê debare xo bikerê. Ez her roje şuxilêna. Roja desturî çin a. Camêrdî şinê vernê mîdyeyan behr ra vejenê. Şewe kenê, çike bi sebebê bêqanûnî yo. Ma dima ra weçînenê. Ma dima ra erzenê makîne û şonê. Ma dima ra fekê înan akenê. Ma ancî şonê. Dima ra zî zerreyê înan pirr kenê û dima ra zî pewijnenê. Roje de ma 2-3 hezar mîdye amade kenê.”