AMED - Şaredarîya Hêne ke kampanya pakitî ya xozayî da destpêkerdiş, bi na wesîla şî serê awa çimeyê Ayn-Kebîr ya dewa Serdî û pakitî vernê de tîya kerd. Hemşaredara Hêne Besîle Narîn, şarî vera pakitîya derûdorî de îqaz kerd.

 

Weçînayîşê 31ê adare de Partîya Têduştî û Demokrasî (DEM Partî) bi pêroyî nêzdîyê 80 şaredarî girewt û dimayê ke şaredarî girewtî xebatê xo dayî destpêkerdiş. Şaredarîya Hêne ya Amedî, bi amancê pawitişê xoza kampanyaya pakitî da destpêkerdiş. Hevşaredare Besîle Narîn derheqê xebatan de agahî da.

 

‘Ceneto nimite’

 

Besîle da zanayîş ke xebatê pakitî dewa Serdî ra dayê destpêkerdiş û amancê înan babeta pakitîya derûdorî de hişmendî awan bikerê. Besîle da zanayîş ke çimeyê awe ya Ayn-Kebîrî dewa Serdî de est a û wina vat: “Tîya cenetêk nimite yo. Bêşik zaf kesî şinê uca. Bi amancê betlane şinê, keyeyê ke şinê seyran est ê. Ma nê keye û ciwanan ra vanê; pakitîya xoza aydê ma hemine ya. Eke ma pak verdê do seba ma pêrûne başêr bo.”

 

Amanc awankerdişê hişmendî yo

 

Besîle tewr peyîn wina vat: “Ma nêzdîyê 4 wesayît çop arêda. Yê ke yenê tîya betlane çopê xo tîya verdenê. La ma keyeyê xo senî pak kenê, ganî ma xozaya xo zî pak bikerê. Awankerdişê hişmendî pakitî ma keyfweş kerd. Ma biwazê ma eşkenê xozaya xo weşik bikerê. Ava Ayn-Kebîr zaf weş a. Her kes yeno tîya eynî fikrî paweno. Raşteyêk turîstik o. Ganî ma pak verdê. Projeyê ma yê pakitî est ê. Ganî ma senî keyeyê xo pak verdenê, ma xozaya xo zî pak verdê.”