AMED - Komêke nasnameyê înan nêdîyar Amed de binê pawitişê polîsan de nuşteyê “Hêdî” û “Pêşî Peya” yê bi kurdkîya kurmancî ya serê rayîrî de bî, bi boyax sîya kerd. 

 

Dimayê Wanî, Amed de zî bi kurmancî “Hêdî” û “Pêşî Peya” ameyî boyaxkerdiş. Şewa bîne saetê derûdorê 03.21î de otomobîlêke, kamyonêke û wesayîtêk bi markayê rangerî ameyî vernîya Şaredarîya Bajarê Girdî ya Amedî. Keso ke wesayîtê rangerî ra peya bi û kaleke ey de çek est bî, cayê lambayê trafîkî ameyî û şîyayîşê wesayîtan kontrol kerd. Dima ra zî 2 kesî wesayît ra peya bî, derûdor kontrol kerdî. Kesê bînî zî bi firçe û boyaxan nuşteyê bi kurdkî sîya kerdî.

 

Heto bîn ra semta Ofîsî ya qezaya Bajarê Neweyî ya Amedî de hem zî xeylêk noqteyê bînî yê bajarî de zî nuşteyê bi kurdkî ameyî sîyakerdiş.