Dejê xo açarnayî têkoşînê azadîye

 

Medya Hawar

 

ŞENGAL  - Cinîyê êzidî pêwa cuya bi dej, her serre tewr zêde bi hêz benê, êdî ne qalê mexdûriyetî, venga têkoşînê azadîye temamê cinîyanê êzidîyan kenê. Înan ra yewe zî Şemê Remo ya. Şemê vat: "Gerîla ma mergî ra xelas kerd. Dayîkê Sûrî bi zerrî û can ma pêşwazî kerdî. Ma deyndarê Serek Apo yê. Ma tu wext peyserê xo xo vîr ra nêkenê.”

 

Ma her serre serrgêra fermanê 3yê Tebaxa 2014ine de hîkayeyanê cinîyanê êzidîyan anê ziwan. Ma vînenê ke cinîyê êzidî pêwa cuya înan a bi dej, her serre tewr zêde bi hêz benê, êdî ne qalê mexdûriyetî, venga têkoşînê azadîye temamê cinîyanê êzidîyan kenê. 

 

Înan ra yewe zî vîrardişanê xo ana ziwan dayîka Şemê Remo ya. Şemê bi emrê xo yê pîlî bi vindertişê xo û bawerîya xo hêz dana xeylêk cinîyanê êzidîyan. Şemê nika endama Koordînasyonê Têgêrayîşê Azadîya Cinîyanê Êzidîyan (TAJÊ) a û wextê qalê vîrardişanê xo kena, reyan kelogirî bena. Hîn vîranê xo qal kena, nêeşkena bigîro û qalê ê wextî kena.

 

Ma do yadkerdişanê aye fekê aye ra bidê…

 

“Şewe û rojêke ma rayîr ra şî. Ma xo resna cayê ke embazê ma est ê. Ê gerîla bîyî. Embazê xort û cinîyan ra pê ameyîne. Ê ameyî vernîya ma. Ma ra persayî vatî, ‘Silahê şima est ê yan nê’. Mi înan ra vat, ez nêdana. Yê derûdorê ma ameyî mi ra vatî, ‘Silah bide înan ê heval ê û do pawitişê ma bikerê. YPG û gerîla yê, hemverê DAIŞî ameyê. Do heyfê ma bigîrê’. Mi înan ra bawer kerd û dima ra new û des fişekê ma yê bîyaye, mi da embazan. Hevalê ke ameyî vernîya ma, ma ra vatî, ‘şewe rayîr ra meşê rê û şima resayî ma uca de bimanê. Semedo ke derûdor de DAIŞ est o. Eke şima şewe rayîr ra şêrê, şima do bikewê mîyanê dafika înan û tehluke’.

 

Ma 10 û 12 keye bî. Kam ci dewe ra ameyîne ma ra derbaz bîne û rayîrê xo dewam kerdêne. Dimayê cayê ke awe est bî, ma vindertî û tîya motara awe est bî. Motore bi hewldayîşê kesan ameye şuxilnayîş û ma awa xo şimite. Ma bidonê verê xo pirrî awe kerd û ma dest bi rayîr ra şîyayîş kerd. Heta ke ma xo resna serê sînorî...

 

Sînoro ke mabêne Iraq û Sûrîye de yo. Kênaya mi o wext 12 rojî bî, mi reyke ewnîya û vat, bi Homayî merde. Kam şîne û ameyîne vatêne se bîyo… Ma înan ra vat, tute merde… Ma verê xo da hevalêke cinî bi cilê leşkerî ver bi ma yena. Gerîla bî û mi ra vat ‘Se bîyo?’ Ameye tute destê mi ra girewte, hîn awe eşt serê rîyê aye ro. Ma dî ke kênaye ha yo boye gêna… Ma ancî qîr kerd û keyfê ma hemine ame. Ma ra vatî do wesayîtî bêrê şima berê.

 

Ma 8 serrî Wargehê Newroze de mendî. Dimayê 8 serran ma agêrayî Şengal. Wargeh de pêro hewcedarîyê ma ca ameyîne. Rewşa ma baş bî. 

 

Heta gerilayê serê koyan ameyî, rewşa ma zaf xirab bî, ma mîyanê tengasiyêk pîlî de bî. Bi desan gerîla semedo ke tîya rayîr abikerê, şehîd kewtî. Ganî heqê ê insanan nêro werdiş. Ma ê kesê ke serê rayîrê azadîye şehîd kewtê, yad kenê. Gerîla êzidijan xilas kerd, yanî mergî ra xilas kerd... Dayîkê ke Sûrîye ra amebî bi zerrî û can amebî serê sînor, semedê pêşwazîkerdişê ma... Ganî êzidî tu wext çîyê ke ameyê kerdiş, xo vîr ra nêkerê…”