Şehrîban Aslan

 

AMED - Dewaya ke rayaumûmî de sey ‘Dewaya Îstîsmarî ya Pasûrî’ yena zanayîş û bi serran o dewam kena, qerarê beratî amebî dayîş û hemverê nê îtîraz amebî kerdiş û îstînafî nê red kerdibî. Dosya semedê temyîzî şirawitî dadgerî.

 

Pasûrê Amedî de mabêne 13ê hezîrana 2014 û 21ê Adara 2015ine de 21 camêrdî bi hawayêkê sîstematîk desteştişê tutêke kerdibî û gerrekerdişê tute ser o, dewa amebî akerdiş. Roniştişê qerarî 28ê êlule 2023ine de 2yîn Dadgeha Cezaya Giran ya Amedî de ame vînayîş. Derheqê şikdar Bayram Baran, Raydin Eren, Bunyamin Can, Emrah Zengin, Erhan Oruç, Ersîn Şahîn, Mehmet Şahîn, Mustafa Şahîn, Fuat Gulsun, Huseyin Çelîk, Mehmet Kara, Mehmet Taş, Melik Seyitvan, Akif Kahraman, Mustafa Yildiz, Yakup Alu, Selahattin Avci, Serhat Eren, Ugur Kahraman, Yucel Akdeniz û Mustafa Altın de bi îdiayê ‘delîlî qels ê’ qerarê beratî ame dayîş.

 

Dimayê qerar ame dayîş dadgehe qerarê xo  ser o eşkera kerd.

 

Muracatê ÎHDyî ame redkerdiş

 

Avûkatê tute, Komeleya Heqê Merdiman ê Amedî (ÎHD) qerar berdî îstînaf. 7ine Daîreyê Ceza yê Dadgeha Edliyeyê Herêmî yê Amedî, bi sebebê ‘raste rast hedîse ra zirar nêdîya’ muracatê ÎHDyî red kerd.

 

Îstînaf, qerarê derheqê şikdaran de ameyo dayîş de çîyêk hemverê huqûqî nêdî. Dosya semedê temyîzî şirawitî dadgerî.