ŞIRNEX - Dewleta tirkan herêma Bêtkar a qezaya Qilêbanî de bi destê qorîcîyan rojane derûdorê 600-700 ton daran birnena û bena bajaranê cîya.

 

Talankerdişê daristanê qezayanê Elkê û Qilebanî yê Şirnexî ke bi destê qorîcîyan ameyo destpêkerdiş, bi aşman o bêmabên dewam keno. Birnayîşê daran ê bi sebebê “viraştişê kalekolî” herêma Bêtkarî ya qezaya Qilebanî de ameyo destpêkerdiş, raşteyêk hîra vila bî.  Birnayîşê daran ver bi çoltarê qezaya Elkê ra hîra beno.

 

Qorîcî, nê daran binê çimdarîyê leşkeran de birnenê. Ame zanayîş ke her kesê beşdarê birnayîşê daran bîyê rojane hezar TL yewmîye gênê û wayîrê traktoran rê zî hezar TL pere danê. 

 

Goreyê agahîyê ameyê bidestkerdiş, semedê darê ke ameyê birnayîş derûdorê 40 traktorî yenê şuxilnayîş. Bi her traktorekî rojane 4 seferî yenê kerdiş. Her seferî de derûdorê 4-5 tonê darî yenê vurnayîş. No zî rojane teqabûlî 600-700 tonê daran keno.

 

Xeylê darê ke yenê birnayîş vernîya qereqolê Xabûr 2 û klubeyê qorîcîyan de yenê arêdayîş. Tîya ra zî bi TIR û kamyonan şirawenê bajaranê cîya.