Elfazî Toral

 

STENBOL - Îdarekarîya Komeleya Cigêrayîşî ya Kurdî Fevziye Uçar, bale ant tedayî hemverê ziwan, deyîranê kurdkî, slogan û govende ser o û vat: "Eke ma wayîrê erjê xo, ziwan û kulturê xo vejîyê, ma do wayîrê statuyê xo zî vejîyê. Hemverê polîtîkayê qirkerdişî, ganî têkoşînêk bi hêz bêro dayîş."

 

Reaksîyonê hemverê polîtîkayê qirkerdişî dewam kenê. Îdarekara Komeleya Cigêrayîşî ya Kurdî Fevzîye Uçar, derheqê babete de ajansê ma rê qisey kerd. 

 

'Wazenê ma bênefes biverdê'

 

Fevzîye, destpêkê qiseykerdişê xo de bale ant serê polîtîkayê AKP-MHPyî yê hemverê ziwan û kulturî kurdî û vat: "Polîtîkayêke lêşin hemverê kultur û ziwanê kurdî yeno kerdiş. Ganî nêro xovîrrakerdiş. Ça xoverdayîş û serkewtişêk bibo dişmin hêrişê uca de keno. Şarê kurdî demê serkewtişî bi dest keno AKP hêriş keno. Her roja ku derbaz beno hêriş zêde benê. Ma vînenê ke kesê ku govende gênê hêrişan reyde rî bi rî manenê. Ne slogan berzkerdiş û ne zî govende gêranayîş qedexe yo. Wazenê ma bênefes verdê, wazenê kultur û ziwanê ma werte ra wedarnê. Labelê şarê kurdî her tim hemverê nê polîtîkayan de mîyanê xoverdayîşî de bîyî.”

 

'Ganî merdim se bikero?' 

 

Fevzîye, dewam de wina vat: "Hêrişî hemverê statuyê kurdan pê yeno. Hetê şaredarîya DEM Partî ra nuştetê bi kurdkî yê rayîran ser ameyî nuştiş ci ra berdî. Nê semedî ra ganî merdim se bikero? Semedo ke ê goreyê xo têgêrenê û polîtîkayê xo rayîr ra benê. Ganî ma bi hêzêk pîl wayîrê kultur, huner, ziwan û erjê xo vejîyê. Lazim o ma her ca de bi ziwanê xo qisey bikerê, her cayî de kurdkî binusê. Eke ma wayîrê erjê xo, ziwan û kulturê xo vejîyê, ma do wayîrê statuyê xo zî vejîyê. Sewbîna têkoşîno ke metrepolan yeno dayîş ganî bêro pîlkerdiş û giranî bidê perwerdeyê bi ziwanê kurdkî."

 

'Serkewtiş do bibo yê şarê kurdî’

 

Fevzîye, wina veng da û vat: "Tenê armancêk sîstemî est o û o zî têkberdişê destkewtişê şarê kurdî yo. Labelê şarê kurdî heta nika bi xoverdayîşî ameyo nê rojan. 100 serrî yo hêrişêk est o û kurd zî her tim pawitişê xo kerdê. Seba herra xo bi hezaran şehîdî dayî. Agêrayîş çin o û peyser gameştiş çin o. Serkewtiş do bibo yê şarê kurdî.”