Nazlican Nûjîn Yildiz

 

ÎZMÎR - Cinîyan reaksîyon vera sazgehê aydê Têgêrayîşê Cinîyanê Kurdan û şîrketê produksiyonî yê JIN TV ke muhtewayan amade keno yê  Silêmanî hetê hêzê asayîşî ra ameyî padayîş mojnayî û dîyar kerdî ke îqtîdar rêxistinbîyayîşê cinîyan ra terseno û nê semedî ra zî sazgehê cinîyan hedef gênê. 

 

31ê kanûne de yewîneyê asayîşî bajarê Silêmanî yê Başûrê Kurdistanî de eşt xeylêk sazgehan ser. Çarçewaya nê sereştişan de şîrketê berardişê medyayî bi nameyê Kompanya Gizîngê Berbeyan padîya, xebatê ci ameyî vindarnayîş. Eynî roje zî hemverê rêxistinê heqê cinîyan de operasyon ame kerdiş. Rêxistina Niwêger û Merkezê Rêxistina Merziye yê binê banê Rêxirawên Jinên Azadixwaz yê Kurdistan (RJAK) hedef ameyî girewtiş, eştî xeylêk adresan ser û peynîya faliyetê înan ardî.

 

Cinîyan reaksîyon vera hedefgirewtişê sazgehan mojnayî û bale antî rolê Tirkîya ya na babete ser o û vatî rêxistinbîyayîşê cinîyan bi qasê Tirkîya PDKyî zî nêrehet keno. 

 

‘Hedefê tedayan de vernê de cinî yê’

 

Endama Paştdayîşê Morî Dîdar Gul da zanayîş ke hedefê vernî yê tedayan cinî yê û wina vat: “Vernê de cinî hedef yenê girewtiş. Na rewşe bi Tirkîya yan zî Kurdistan de sînor nîya. Ma her cayê dinya de serhildanê cinîyan dir yenê rî bi rî. Cinî hemverê hêrişan de xo rêxistin kenê. Nê semedî ra zî her cayê dinya de rêxistinbîyayîşê cinîyan beno hedef. Tecrube û têkoşînê têgêrayîşê cinîyanê kurdan rastîyêk bîn zî nîşanê cinîyan dano. Ewro her cayê dinya de qalê têgêrayîşî yeno kerdiş. Ancî ma qalê şerêk bi serran yeno kerdiş kenê. Mîyanê nê şerî de cinîyê kurdî destkewtişê taybetî û muhîmî bidest kerdî. Nê semedî ra zî nê hêrişî ganî zaf hetî ra bêrê  fikryayîş. Padayîşê nê sazgehan parçeyêk polîtîkaya qeyûmî yo. No zî bi zelalî yeno vînayîş. La cinî xoverdayîşê xo pîl bikerê û sere nêtewênê.”

 

‘Ganî merdim tarîx û cografyaya biewno’

 

Hemsereka DEM Partî ya Muglayî Neslîşah Çetînkaya zî da zanayîş ke semedê padayîşê RJAKî bêro analîzkerdiş ganî cografya û tarîxê Kurdistanî ra bêro ewnîyayîş û wina vat: “Cografyayêke dergûşa serdemê neolîtîk a. Tewr muhîm zî komelê xozayî, yanî komelê cinî-dayike tîya dest pêkerd û uca de vilayê dinya bî. Serdemo ke zîhnîyetê parekerdiş û zîhnîyetê hempar aver şîyo. Berardişê zêde yê komelî aver şî û îcadê tewr pîl yê tarîxê merdimayî de prosesê tarîxî pê ameyî. No qonax tena şorişê dewe nê û şorişê ramitişî yo, eynî wextî de şorişê roşnvîrî, şorişê cinî û şorişê kulturî yo û cuye dorê cinî de awan bena. Kulturê îlahîya dayîke esas o. Yanî hêzo ke dinya açarnayo cehenem hema zî şaristanîya cinî talan nêkerdo û çin nêkerdo.”

 

‘Rêxistibîyayîşê cinîyan înan nêrehet keno’

 

Hemsereka DEM Partî ya Aydinî Şukran Sari zî wina vat: “Eşkera yo ke na babete de pêameyê eşîrî yê kanî Başûrê Kurdistanî de tifaqê faşîstî dir pîya yo. Her çiqas zîhnîyetê cîhadîst mehkûmê çopê tarîxî yo zî wazenê ke sey astengîya vernîya cinî serkêşa azadîye ya serdemê ma wedarnê. Bîyayîşê rêxistinbîyayîşî yê cinîyan Başûrê Kurdistanî de semedê resnayîşê hişmendîyê neteweyî yê pêro keyeyê Başûrê Kurdistanî de wayîrê muhîmîyêk pîlî yo. Na rewşe bi qasê Tirkîya, PDKyî zî bêzar kena."