Elfazî Toral

 

STENBOL - Verfeka TJK'yî Ayten Kaplan dîyar kerd ke kampanya "Abdullah Ocalanî rê Azadî, Meseleya Kurdî rê Çareserîya Sîyasî" pêro welatê Ewropayî kewtê mîyanê têgêrayîşî û dîyar kerd ke heta azadîya fîzîkî ya Abdullah Ocalanî pê bêro, do kampanya dewam bikero.

 

Kampanyaya “Abdullah Ocalanî rê Azadî, Meseleya Kurdî rê Çareserîya Sîyasî” ke hetê şarê kurdî û dostanê înan ra 10ê teşrîna verêne 2023ine de ameya destpêkerdiş, dewam kena. Kampanyaya ke semedê azadîya fîzîkî ya Rayberê Şarê Kurdî Abdullah Ocalanî ameya destpêkerdiş, welatanê Ewropayî de zî rojane dewam kena. Çalakîyê tewir bi tewir bi hemkarîya têgêrayîşê cinîyan xeylêk cayê Ewropayî bi taybetî Swîsre, Fransa, Elmanya, Belçîka, Hollanda û Awûstûrya dewam kenê. Çalakîya semedê azadîya fîzîkî ya Abdullah Ocalanî ya temamê dinya, xeylêk cayê dinya de bi mana beno, ame dîyarkerdiş ke heta azadîya fîzîkî ya Abdullah Ocalanî do dewam bikero.

 

Verfeka TJK-E'yî Ayten Kaplan rewşa bîyaye ya kampanyaya "Abdullah Ocalanî rê Azadî, Meseleya Kurdî rê Çareserîya Sîyasî" ser o qisey kerd.

 

'Ganî nê wareyî de azadîya fîzîkî bêro qetîkerdiş'

 

Ayten Kaplan dîyar kerd ke çarçewaya kampanyaya "Abdullah Ocalanî rê Azadî, Çareserîya Sîyasî ya Meseleya Kurdî" ser o va: "Ma xeylêk rojê wendişî, panel û xeylêk çalakîyê kuçeyan û çalakîyê nasnakerdişê paradîgmaya Rayberî organîze kerd." Ayten Kaplan, dewam de va: "Hem warêyê paradîgmaya cinî ya Rayberî û hem zî hetê îdeolojiya azadîya cinî ra ameyî kerdiş. Na çarçewa de heta roja ewro ame. Demê peyîn de xeylêk kesê ke Xelata Nobelî ya aştîye girewtî, paştdayîş dayî nê vengdayîşî û îmza eştî nê vengdayîşî. Vengdayîşê komelê demokratîkî dir vengdayîşêk pîl amekerdiş. Ma bi pêro çalakîyê xo yê 8ê Adare vengdayîşê wayîrvejîyayîşê Rayberî kerd. Seke têgêrayîşê ma xebatê xo yê semedê caardişê hemle û vengdayîşî ercna. Hêvîya ma o yo ke nê prosesî de Rayber heqê hêvîye ra feyde bigîro û mîyanê şert û mercê têduştî de bo. Eke şert û mercê vuryayî û vurnayîşî goreyê dewlete bi xo bibê, ganî nê şertan zî Rayberî rê peyda bikerê. Ma a bawerî de yê ke ganî nê warî de azadîya fîzîkî bêro qetîkerdiş."

 

'Heta ke azadîya fîzîkî pê bêro do kampanya dewam bikero'

 

Ayten Kaplan dewam de va: "Têgêrayîşê cinîyan xeylêk cayê Ewropayî bi taybetî Swîsre, Fransa, Elmanya, Belçîka, Hollanda û Awûstûrya de xebatê xo kenê. Paradîgmaya Rayberî sey alternatîfê sîstemê bîyaye yeno vînayîş. Ma nuqteyêke wina de yê ke nika sîstem ameyî astengkerdiş. Sîstemêk est o ke cuya xo ser fikrîyenê, la dewamkerdişê nê sîstemê şerî û koçberî ano. Cewabê nê krîzê ke çar hetê dinya ameyî cuyayîş, çin ê. Bi taybetî zî wexto ke sey Tirkîya bîyayîşê xo de bi israr bo, her ke şino zêdeyêr açaryeno çîyêk leşkerî. Bi destbendkerdiş, tepiştiş û tepisnayîşê kesê ke hemverê nê sîstemî yê, nêeşkenê çareserî pê bîyarê. Heto bîn ra paradîgmaya Rayberî zî vana, her çî şar dîyar keno û şar bixo zî dîyar keno ke senî wazeno biciwîyo. La problemanê xo zî pîya çareser kenê."

 

'No vengdayîş îmkanêk tarîxî yo'

 

Ayten Kaplan dîyar kerd ke kampanya derûdorî rê danê şinasnayîş û va: “No têgêrayîş feydeyê pîlî xo dir ardî. Netîceya nê têgêrayîşî de dewlete şî uca. Komel êdî eşkeno bibo bingehê aramî, aştî, weşikî û biratî û cuya hempar. Nê wareyî de gamê ke dewlete eşkena bierza est ê. Ganî komîte û heyetî bêrê awankerdiş. Lazim o serê awankerdişê aştîyêke demokratîke munaqeşeyî bêrê kerdiş. Eke çareserîyêk rast virazîyo, lazim o parlamento, qanûn û komel pîya bê. Eke dewlete wazena mabêne şaran de wayîtî û biratî, aştî û aramî virazno, ganî cesûr bo û proses aver bero. Ganî muhîmîyê têgêrayîşî tîya de bêro vînayîş. Bi vengdayîşê Rayberî, têkoşînê 50 serrî yê şarê kurdî, erjê ke vejîyayê werte û sebebê bîyayîşê xo bi dest kerdê. Badê vengdayîşê şarî îradeyê xo eşkera kerd û şar hazir o. No vengdayîş îmkanêk tarîxî yo. Kurdî nê prosesî rê hazir ê û paweyê gamêke yê. Ganî her kes berpirsiyarîyê xo bizano. Ez a bawerî de ya ke ma do bi xurtkerdişê destê Raybertî, bi pawitişê pêro erjê ke vejîyayê werte serbikewê.”