Avûkatê girewteya sîyasî ya kurd Pexşan Ezîzî Mazyar Tatayî hesabê xo yê X’î ser o dîyar kerd ke mehkemaya Îranî reya diyîn waştişê newe ra muhakemekerdişê Pexşan Ezîzî red kerd.

 

Mazyar Tatayî dîyar kerd ke mehkemaya Îranî bê ke dosyaya Pexşan Ezîzî temaşe bika, pawitişê avûkatan ‘musaît nîyo’ pênase kerd û waştişê newe ra muhakemekerdişî red kerd. 

 

Rojnamegera kurde û aktîvîste Pexşan Ezîzî 4ê tebaxa 2023î de Tahran de ameye destbendkerdene. Pexşan Ezîzî 11ê teşrîna peyêna 2023î de bi sucî ‘Vera hukmatê Îranî çalakîya bi çeke’ ameye girewtene. Mehkemaya Şorişî ya Tahranî 23ê temmûza 2024î de cezaya dardekerdişî daye Pexşan Ezîzî. Qerar 8ê çeleya 2025î de hetê Komîsyonê Hukmê Berzî yê Îranî ra cezaya dardekerdişî ya çalakîkera kurd Pexşan Ezîzî ameye qebulkerdene.