ANQARA - DEM Partî, derheqê îdîayê 13 madeyê ke çapemenî rê ameyî neqlkerdiş ke serekkomarî rê ameyî pêşkêşkerdiş de eşkerayîyêke da û lîste red kerd.

 

Partîya Têduştî û Demokrasî (DEM Parti) derheqê lîsteya 13 madeyê ke çapemenî de ca girewt û îdîa kerdî ke Heyetê Îmraliyî 10 nîsane de Beştepe de serekkomar Tayyip Erdoganî dir pêvînayîş kerdo de eşkerayîyêke da û îdîayan red kerd.

 

Verfeka Partîye Ayşegul Dogane derheqê babete de wina va: “Heyetê Îmraliyî yê DEM Partî Serekkomar Erdoganî dir ercnayîş kerd ke proses do senî aver şêro û do senî bibo. La ancî zî; lîsteyê waştişê 13 madeyî yeno pêşkêşkerdiş, waştişê ke DEM Partî xeylêk rey çapemenî de rayapêroyî dir pare kerdo yo. Badê pêvînayîşî eşkerayîyêke nuşteyî ame kerdiş. Lîste serekkomar Erdoganî rê nêameya pêşkêşkerdiş. Raşt nîyo ke rojeve û babetê ke aşman o rayapêroyî dir yenê munaqeşekerdiş bêrê rêzkerdiş û badê zî sey ‘Lîsteyê Waştişî’ bêro pêşkêşkerdiş.”