AMED - Amedîyijan derheqê qetilkerdişê cinîyan de qisey kerdî û dîyar kerdî ke hemverê şîdet û qetilkerdişê cinîyan paştdayîşê cinîyan muhîm o û ferz o.

 

Bajaranê Tirkîya û Kurdistanî de cinî her roje bi hedîseyê neweyî yê qetilkerdişê cinîyan dir aya benê. Cinî xo mîyanê asayîşî de hîs nêkenê û hêrsê cinîyan hemverê qetilkerdişan zêde beno. Polîtîkaya bêcezaverdayîşî paştdayîş danê şikdaran û nê semedî ra bi rehetî şîdet dewam kenê.

 

Cinîyê Amedî derheqê qetilkerdişê cinîyan de ajansê ma rê qisey kerdî.

 

‘Ez kewta mabêne şîdet mi rê zî kerdî’

 

Selcan Baykiş: “Ma hemverê şîdetî de bêveng nêmanê. Ma hedîseyê şîdetî vînenê la kes veng nêdano. Ez sey cinîyêke nêeşkena şan de vejîyî teber. Ê rojan ez şîya teber. Cinîyêke rê şîdet ameyîne kerdiş. Ez şîya kewta mabêne la şîdet mi rê zî kerd. Ez nê vana, hemverê şîdetî de bêveng nêmanê. A rojan cinîyêk şîdet dîne, ez şîya kewta mabêne. Badê ma camêrdî dir munaqeşe kerd. Cinîya mexdûre zî bermayîne. Mi va, polîs bigêrî va, ‘nê megeyre, mi ra hes keno.’ Qey merdim hes bikero şîdet keno?”

 

‘Camêrdî vajê çi o beno’

 

Besra Yildiz: “Komel erje nêdano cinîyan. Cinîyan erzenê planê diyîn. Nê semedî ra ez xo asayîş hîs nêkena. No keye ra destpêkeno. Cinî sey obje yenê vînayîş. Keye de camêrdî vajê çi o yo. Her vatişê pî û biran derbazdar o. Perwerdeyî de zî erzenê planê diyîn. Cezayê giranî nînê dayîş. Heta ke zilm û eziyet bêceza bimano, do averşîyayîş zî çinî bo.”

 

‘Ganî têkoşîno hempar bêro dayîş’

 

Bahar Yalçin: “Şîdetê cinîyan ser o pêro dinya de est o. Qetilkerdişê cinîyan êdî normal yeno vînayîş. Wexto ke reaksîyon yeno mojnayîş, sey ti hemverê dewlete vejîyaya. Ganî ma bibê yew û hemverê nê de têkoşîn bikerê. Şandînan badê saetêke cinî nêeşkenê vejîyê teber. Ganî ma têkoşîno hempar bidê. Eke têkoşîn bêro dayîş ma do netîceyê pozîtîf zî bigîrê.” 

 

‘Wa cinî bêveng nêmanê’

 

Dîlek Yolagelen: “Ma xo asayîş hîs nêkenê. Tutêk wina asan pîl nêbeno. Ganî cinî hemverê tedayan bêveng nêmanê. Ganî tedbîrî bêrê girewtiş. Ganî cinî hemverê zextê komelî tedbîranê xo bigîrê. Ganî ma çareserî pê bîyarê û tedbîranê xo bigîrê.”

 

‘Ez xo asayîş hîs nêkena’

 

Pinar Çîgdem Tepe: “Ma cinî bi hawayêk azad nêeşkenê vejîyê teber û ma wayîrê yewbînan nêvejênê. Ganî ma cinî bibê hêz û wayîrê yewbînan bivejîyê. Ganî ma mîyanê paştdayîşî de bê. Ez sey cinîyêke xo asayîş de hîs nêkena.”

 

Gulşah Suncay: “Çi heyf rewşe baş nîya. Wexto ke ma anê ziwan, vanê şima femînîst ê. Ma na rewşe ra asan nîyê. Mêrdeyê mi zî asan nîyo. Semedo ke tutêke ma est a, ma ameyox roşn nêvînenê. Ma xo asayîş de hîs nêkenê. Ganî ma vernî padê. Goreyê mi ma ê hêzî de yê ke eşkenê vernî padê.”

 

Zuhal Kiliç: “Kênayê ma tersenê, şan de nêefterenê vejîyê. Ma zextan kênayanê xo rê kenê ke rew bêrê keye. Ma na rewşe ra keyfweş nîyê. Asayîş nêmendo. Cinî malê tu kesî nîyê. Wa zextan cinîyan rê nêkerê. Cinî ameyox ê. Wa nê tedayî peynî bibê.”