ANQARA - Sebebê qerarê beraetî ya derheqê rojnamegere Melek Avci de, bi bale antişê serê qerarê Dadgeha Berzî ya Îstînafî û DMME'yî, ame vatiş ke nuşteyê aye sey çalakîya rojnamegerîye ameyê hesibnayîş.

 

Serdozgerîya Komare ya Anqarayî hemverê mûxabîra ma Melek Avci ke bi tohmetê "propagandaya rêxistine" cipersayîşêk da destpêkerdiş û 6ê êlule 2024ine de semedê îfadeyî venga ci dayî. Îdîanameyo ke badê cipersayîşê hemverê Melek Avci ke qereqolê polîsan de îfade da, amebî amadekerdiş, hetê 19ine Dadgeha Cezaya Giran ya Anqarayî ra ame qebûlkerdiş. Roniştiş peynîya dewaya ke Melek Avci ci de ameyîne muhakemekerdiş, 29ê nîsane de 19ine Dadgeha Cezaya Giran ya Anqarayî de ame kerdiş û qerarê beraetî ame dayîş.

 

Sebebê qerarê beraetî de ame vatiş ke parekerdişê medyaya dîjîtale yê Melek Avci de goreyê qerarê Dadgeha Berzî ya Îstînafî û Dadgeha Heqê Merdiman ê Ewropayî (DMME) ameyê erjnayîş û ame qetî kerdiş ke parekerdişê ke qalê înan yeno kerdiş çarçewaya çalakîya rojnamegerî de yê.