STENBOL -Cinîyê ke dîyar kerdî ê wazenê Komîsyonê Pêgirewtişê Neteweyî, Wayûbirayî û Demokrasî de wayîrê vatişî bê û vatî: "Cuya demokratîk cinîyan dir bingehêk têduşt û azad sebebê bîyayîşê cuye yo.”

 

Dimayê vengdayîşê Rayberê Şarê Kurdî Abdullah Ocalanî yê semedê "Komelê Aştî û Demokratîkî" 27ê Sibate de, PKK’yî mabêne 5 û 7ê Gulane de kongreya xo organîze kerd û fesihkerdişê xo neql kerd. Dimayê merasîmê bêçekkerdişê PKK’yî yê 11ê Temmuze Silêmanî de, Komîsyonê Pêgirewtişê Neteweyî, Wayûbirayî û Demokrasî, Parlamento de ame awankerdiş. Ma zanê ke cinî prosesê aştî û dayîşûgirewtişî de rolêk muhîm kay kenê. Labelê, semedo ke 51 endamê komîsyonî ra tena 9 kesî cinî yê, têkoşînê cinîyan awankerdişê komelêk demokratîkî de kewto pey. Endama Meclîsê Partîya Herêmanê Demokratîke (DBP) Dîlber Demîr û Hemsereka Partîya Têduştî û Demokrasî (DEM  Partî) ya qezaya Kagithaneyî ya Stenbolî Sida Yildiz prosesê Komelê Demokratîkî ke vejîya werte erjnayî û vatî, "Ma komîsyon de helwestêk dir rî bi rî yê ke cinîyan peygoş kenê û îradeyê cinîyan nêdano vernî."

 

Dîlber Demîr dîyar kerd ke vengdayîşê Rayberê Şarê Kurdî Abdullah Ocalanî yê semedê "Aştî û Komelê  Demokratîkî" yê 27ê Sibate de pêro komelî eleqedar keno û va, ganî ma xo birêxistin bikerê û cewabê nê vengdayîşî bidê. Dîlber Demîr va, "Sey cinî, ganî ma bi rêxistinkerde cewabê nê vengdayîşî bidê ke komel birêxistin bikerê û do bihêz bikerê ke bibo hêzêk serkêş. Semedo ke semedê komelêk demokratîk vengdayîşêk zaf bierj o. Ganî ma cinî ma wina rewşêke de bê, ma hem xo û hem zî temamê komelî xo dir birêxistin bikerê."

 

‘Vengdayîşê Komelê Demokratîkî zorê nê hişmendiyan do bero’

 

Dîlber Demîr, dîyar kerd ke 51 endamê komîsyonî ra tena 9 cinî yê û va: "Tena DEM Partî têduştîya cinî û camêrdan bi dest kerda. Wexto ke ma partîyê bînan ra ewnîyenê, CHP’yî de di endam û AKP’yî ra yew yan di endamê cinî est ê. Ma bi zelalî vînenê ke cinî xêrcê DEM Partî, cay bînan de rolêk muhîm nêgînê. Cinî her hetê sîyasetî de ca nêgînê, no problemêk hişmendî yo. Vengdayîşê semedê komelêk demokratîk vengdayîşêk o ke nê hişmendiyan vurneno. Vengdayîşêk ameyo kerdiş ke cinî eşkenê rayberî bikerê û wayîrê vatişî bê û rayîrê nê vengdayîşî de ma do her wareyî de laver şêrê û pîl bibê. Şer hişmendîyêk camêrdan o, la cinî her wext semedê aştîye bîyê.”

 

‘Eke cinî azad bibê, komel zî do azad bibo’

 

Dîlber Demîr dewam de wina va: "Ewro, wexto ke krîzê ekonomî hende kûr bîyo û cinî yenê peygoşkerdiş û qirkerdişan ra yenê derbazkerdiş, ganî ma vengdayîşê semedê Komelêk Demokratîk hîra bikerê û komelî her ca de birêxistin bikerê. Rêxistinî çinî bo do komelêk bêexlaq û sîyaset vejîyo werte. Wexto ke ma ewro ameyox ra ewnîyenê, ma nêeşkenê qalê komelêk exlaqî û sîyasî bikerê. Ganî pêro rêxistinê komelê sivîlî û platformê cinîyan nê vengdayîşî ko bikerê. No çîyêk ke tena partiyê sîyasî dir bêro kerdiş nîyo. Eke cinî azad bibê, komel zî do azad bibo."

 

‘Komel aştî wazeno’

 

Sida Yildiz zî dîyar kerd ke tarîx de yewin rey o ke komîsyon meclîs de awan beno û çareserîya meseleya kurdî, berpirsîyarîya ma pêrûne ya. Sîda Yildiz wina va, "Şarê ma yê ke bi serran o binpaykerdişê heqan, cîyayî û xeylêk dejan ra derbaz bîyê, wazenê aştîye de bibê vengêk. Bêşik, şarê ma semedê nê wareyê qanûnî de ganî wayîrê rolêk muhîm de bê, nê çî bi hawayêko qanûnî laver berê. Ez bawerkena nika şarê ma semedê aştîyêke bi rûmet amade yo. Seke yeno zanayîş, nê herran dejê bêhempa dîyê. Şar raştê xeylê îhlalkerdişê heqan ameyo. Komel êdî aştî wazeno. "

 

‘Ma, cinî zî wazenê komîsyon de wayîrê vatişî bê’

 

Sîda Yildiz, tewr peyîn wina va, "Sey cinî, ma bi seserran nê polîtîkayê bidej dîyê. Nê semedî ra ma cinî tewr zêde hewceyê aştîye yê. Dayîkê aştîye, dayîkê pêro kesê ke şer de dinyaya xo bedelnayê,  hewceyê aştîye yê. Seke yeno zanayîş do komîsyon Dayikê Aştîye dir zî bêro têhet. Ma nê zaf biqîmet vînenê. Cinî û dayîkî bi rayîrşîyayîşê ver bi Meclîsê Girdî yê Tirkîya de serkêşî kerdî û îradeyê xo mojnayî. Înan parlemento de waştişê xo semedê awankerdişê komîsyonî kerdî, lazimîya xo semedê aştî ardî ziwan. Waştişê dayîk û cinîyan ê bîn zî veradayîşê tepişteyê siyasî yo. Ganî komîsyon nê warî de gaman bierzo û xo berpirsiyar bivîno ke hêviya şarê ma ya semedê aştîye tewr xurt bikero.”