Gulistan Gulmuş

 

AMED - Cinîyê ke beşdarê komxebatê "Îdeolojîya xelasîya cinîyan" yê ke hetê Meclîsê Cinîyan ê DBP'yî ra yenê organîzekerdiş bî, muhîmîyê komxebate dîyar kerdî û vatî ke semedê prosesê aştîye cewabêk pozîtîf bêro girewtiş, ganî azadîya cinîyan bêro qetîkerdiş.

 

Meclîsê Cinîyan ê Partîya Herêmê Demokratîk (DBP) atolyeyê xo yê "Îdeolojiya Xelasîya Cinîyan" dewam kenê, cinî dewe bi dewe, kuçe bi kuçe û tax bi taxe gêrenê. Atolyeyê ke resenê hûmarêke pîl ê cinîyan,  perspektîfê Rayberê Şarê Kurdî Abdullah Ocalanî "Îdeolojîya Xelasîya Cinîyan" neql kenê. Atolyeyêke zî qezaya Bismilî ya Amedî de amî organîzekerdiş.

 

Cinîyan fikrê xo munaqeşeyê atokyeye ser o pare kerdî.

 

'Rêxistinkerdiş yeno manaya bihêzkerdişê cinîyan'

 

Endama Meclîsê Şaredarîya Bismilî Ozlem Yildiz dîyar kerd ke amancê înan oyo ke cinîyan bihêz bikerê ke linganê xo ser vinderê û ê hewl danê ke her cinî dir têkilî ronê. Ozlem Yildiz va, "Tîya rezê ma est ê. Cinî nê rezan de xebityenê. Ma nê atolyeyan semedê averşîyayîşê cuya hembeş û rêxistinkerde organîze kenê. Ma wazenê cinî xo û xozaya xo fam bikerê. Ma nê rezan de dest pêkerd û ma do dewam bikerê. Ma mîyanê zîyanî de îsot, firingî û balîcanan ramenê û ma bi hawayêko akerde fikrîyenê. Çiqas ma akerde bê zî ma eşkenê biresê tewr zêde cinîyan û ma eşkenê tewr zêde înan  bi rêxistin bikerê. Rêxistinkerdiş yeno manaya bihêzkerdişê cinîyan. Ma çiqas hîra bikerê, ma do hende biresê cinîyan.”

 

'Yew babetêka tewr muhîm zî komun a'

 

Hemsereka Qezaya DEM Partî ya Bismilî Halîse Deyar Erkek zî wina va, “Ma komunanê cinîyan ser o gelo komunê cinîyan çi yê û rêxistinê cinîyan senî xebityenê munaqeşe kenê. Tîya de rezê ma est ê. Cinî saete 5ine de resenê. Enguran arêdanê û kenê mîyanê qutiyan. Badê cu zî benê cayê kr uca roşenê. Ameyîşê ci sey kooperatîfêk keyeyan dir pare kenê. Ma wazenê atolyeyê bînan awan bikerê û meclîsan awan bikerê. Yew babeta tewr muhîm prosesê komelê demokratîkî de komun ê. Çiqas komunê ma zêde bê, ma eşkenê hende rêxistinî semedê cinîyan peyda bikerê. Serkêşîya cinîyan nê wareyî de zaf muhîm a. Ma wazenê biresê pêro hevalên xo yê cinî û komun awan bikerê."

 

'Bîyayîşê DBP û TJA'yî semedê ma zaf muhîm o’

 

Rozerîn Yenisoy bale ant lazimîyê atolyeyê winasî û wina va: "Têhetameyîşê semedê îdeolojîya xelasîya cinîyan, hewldayîş wazeno. Ganî hevalî bêrê û hişyarîya ma berz bikerê û na mana de lazimî yo ke raya pêroyî bêro perwerdekerdiş. No semedê ma zaf muhîm o ke DBP û TJA hevalanê xo yê cinîyan dir bêrê têhet. Ganî ma taxan, dewan de komun awan bikerê. Ganî ma her cayî de biresê cinîyan, zîyanan, tekstîlan de û serayan de. Barê ma giran o, la rayîrê ma zelal o. Rayberî nê rayîrî verê ma de rona. Wezîfeyê ma yê ewil oyo ke ma bawerîya xo bi nê rayîrî bîyarê. Ganî ma nê prosesî de kîşte şarê xo de vinderê.”