STENBOL - Dayikê Şemeyî Wareyê Galatasarayî de bi qerenfîlan û fotografê kesê ke destbendkerdişî de ameyî vînîkerdiş kom bîy û semedê Nazim Gulmezî edalet waştî.

 

Çalakîya Dayikê/Merdimê Şemeyî ke aqûbetê merdimanê xo yê destbendkerdişî de amey vînîkerdiş persenê û wazenê kerdoxê înan bêrê eşkerakerdiş û muhakemekerdiş, hewteyê 1077ine de domnayî. Dayikê Şemeyî, Wareyê Galatasarayî de bi qerenfîlan û fotografê kesê ke destbendkerdişî de ameyê vînîkerdiş kom bîyî û semedê Nazim Gulmez edalet waştî.

 

Eşkerayîya çapemenîye hetê endamê ÎHD’yî Umît Tekay Dişli ra ameye wendiş. Umît Tekay Dişli ard vîr ke berpirsîyarîyê kesê ke yenê destbendkerdişî yê dewlete yo û va: “Nazim Gulmez 61 serre, babîyê new tutan, dewa Taşitli ya qezaya Xozatî ya Dêrsimî de ciwîyayîne. Nazim Gulmez ke bi zîyan û heywanan eleqedar bîne, cematê xo de zaf ameyîne heskerdiş û rêze ci rê ameyîne mojnayîş.”

 

Umît Tekay Dişli dîyar kerd ke leşkerê Lîwaya Komando yê Bolûyî 14ê teşrîna verêne yê 1994ine de şî dewa Taşitli û va: “Saete dorê 9:30ê sibayî de leşkeran Nazim Gulmez keyeyê ey ra berdî ke operasyonê domnaye de bibo rayberê înan. Gulmez û hîrê dewijî bînî berdî. Muxtarê dewe û heme dewijî şahidê hedîse yê. Her hîrê kesê ke leşkeran  Gulmezî dir berdî, dimayê wextêk ameyî veradayîş û şî dewe, la reyke bîne Gulmezî ra agahî neame girewtiş. Wexto ke cinîya ey Garip Gulmez leşkeran persa ey kerd, selahîyetdaran va, ‘leşkeran ey berdo merkezê bajarê Tûncelî û uca de verdayê.’ Îtirazê Garip Gulmez ke va ‘Mêrdeyê mi wendox o û rayîr zaneno; eke o biameyîne veradayîş, o do biameyîne keye’ bêcewab mend.”

 

Umît Tekay Dişli dîyar kerd ke keyeyê Gulmezî muracatê Dozgerîya Xozatî kerd û va: “La derheqê vînayîşê Gulmezî de tu tedbîrê bi bandor neameyî girewtiş. Dosyaya cipersayîşî mabêne Dozgerîya Xozatî, Dozgerîya Leşkerî ya Xarpêtî û Dozgerîya Dadgeha Asayîşê Dewlete ya Meletî de şî û ameye. Semedê ke dozgeran hewl û xebata lazimî semedê ronayîşê dewa nêmojna, dewa de tu averşîyayîş çin bî. 31 serrî çarenûsê Nazim Gulmez tarîyî de mend û kerdoxê ey bi bêcezayî yenê pawitiş. Çend serrî derbas bibo zî, ma do fek waştişê edaletî semedê Nazim Gulmez, semedê heme vînîbîyayeyanê xo veranêdê û bîyarê vîrê her kesî ke ganî dewlete goreyê metodê heqî yê mîyanneteweyî hereket bikero.”

 

Çalakî bi ronayîşê qerenfîlan Wareyê Galatasarayî de peynî bî.