MERKEZÊ XEBERAN - KCDK-E’yî bi munasebetê 4ê Nîsane Rojbîyayîşê Rayberê Şarê Kurdî Abdullah Ocalanî eşkerayîyêk daye û vat: “4ê Nîsane rojbîyayîşê kurdanê azad, cinîyanê azad û aqilê stratejîk ê girdî yo.”

 

Kongreya Komelanê Demokratîk ê Kurdîstanî ya Ewropa (KCDK-E) bi eşkerayîyêka nuştekî rojbîyayîşê Rayberê Şarê Kurdî Abdullah Ocalanî yo 77. pîroz kerd û nê çîyî vatî: “Mizgînîyan wisarî 4ê Nîsane ya. Na roje, roja rojbîyayîşê Rayber APOyî ya. Rojbîyayîşê ey tena şarê kurdî rê nê; şaranê Rojhelatê Mîyanên û heme merdimîye rê pîroz bo. 4ê nîsane rojbîyayîşê kurdanê azad, cinîyanê azad û aqilê stratejîk ê girdî yo.”

 

Dewamê eşkerayîye de nê çî ameyî vatiş:  

 

“4ê Nîsane 1949 tarîxê Kurdîstanî de şikitişêk o. Na roje seba şaranê Kurdîstanî, bingeyê azadîye ser o prosesê bedilîyayîş û bedilnayîşî dayo destpêkerdene.

 

Rixmê şer û kaosanê ke pêroyê dinya ra vila bîyê zî perspektîfê rayîrê hîrêyin ke Manîfestoyê Azadîye yê Rayber APOyî de est o, heme problemanê komelkî û neteweyî rê çareserîyêk o. Roja ewroyîne modernîteyo kapîtalîst, şerê dinya yê hîrêyin gir keno û wazeno Rojhelatê Mîyanênî şeranê mezheb û neteweyan mabênê şaran de qiyametêk bikero. Tam na nuqta de rayîrê Rayber APOyî sey rojêk xo mojneno.

 

Vengdayîşê aştî yê Rayber APOyî û fikrê komelê demokratîkî, seba çareserîya aştîyane û temînkerdişê aştî û demokrasîyê mabênê şaran de yewin çareserî yo. Na rastî reyde girêdaye, seba aştî û demokrasîya şaran ganî derheqê azadîya fîzîkî ya Rayber APOyî de gamê şênberî bêrê eştene.

 

Şarê ma pîrozkerdişanê Roşanê Newroza emserî de heme qadan de seba azadîya Rayber APOyî helwêstê xo bi hewayêko eşkera mojna. Nê semedî ra ma eşkenî vajê ke Newroze seba azadîya Rayber APOyî bîye referandumêk. No waştişo ke şarê ma pîrozkerdişanê Newroze de mojna, xerîteya xebatanê ma yê emserî ya.

 

Ma bi nê nêzdîbîyayîlşî vanê ke: Serra 2026î do biba serra azadîya Rayber APOyî. Seba ke azadîya Rayber APOyî, azadîya şarê ma ya; serkewtişê prosesê aştî û komelê demokratîkî ya, awankerdişê waûbirayîya şaran a.

 

Ma mecbur ê ke bi rayîrê perspektîfê komelê demokratîkî rêxistinkerdişê bi mîlyonan Kurdîstanijan Ewropa de gird bikerê. Sey vejîyayîşê toximanê wisarî ganî ma nê rêxistinbîyayîşî bîyarê ca.

 

Sey KCDK-E ma 4ê Nîsane rojbîyayîşê Rayber APOyî şarê ma rê pîroz kenê û vengdanê ke 4ê Nîsane sey ruh û coşê Newroze bi hewayêko girseyî bêro pîrozkerdene.”