AMED - Rojhilat Aksoy ke semedê nawitişê fîlmê anîmasyon ê qalê Qirkerdişê Ermeniyan kerdêne, derheqê aye de dewa amebî akerdiş, beraet kerd.

 

Semedê nawitişê fîlmê anîmasyon ê bi nameyê “Zayîna Aurayê” ke qalê Qirkerdişê Ermeniyan kerdêne, derheqê rejîsore Rojhilat Aksoy de bi sebebê “Qijvistişê sazgehê dewlete” dewa amebî akerdiş. Roniştişê diyîne 22yîne Dadgeha Ceza ya Asliyeyî ya Amedî ame vînayîş.

 

Roniştişo ke bi tesbîtkerdişê nasnameyê dest pêkerd dozgerî mutalayê xo de waşt Rojhilat Aksoy bêro cezakerdiş.

 

Dimayê avûkatê dosyaye Firat Yildiz pawitiş kerd, dîyar kerd ke ê tewrê mutalayê dozgerîye nêbenê û waşt muwekîla ci beraet bikero.

 

Dimayê pawitişê heyetê dadgehe derheqê dosyaye de qerarê beraetî da.