AMED- Şaredarîya Amedî ya Şaristanê Girdî, çarçewaya polîtîkaya xo ya şaredarîya zafziwanîye de, bi kursê kurmanckî û kirmanckî(zazakî) ke seba personelanê xo dayî destpêkerdene, amanc kena ke xebitnayîşê ziwanan ê warê pêroyî xurt bikero, xizmetan de seypêyîye zêde bikero û piştî bido pawitişê mîrasê kulturî.

 

Serekîya Daîreyanê Çimeyê Merdiman û Perwerdeyî, bi amancê pawitişê zafziwanîye, warê pêroyî de zêdekerdişê asayîşê ziwananê dayîke û piştîdayîşê zafrengîya kulturîye, seba personelanê şaredarîye kursê ziwanî dayî destpêkerdene. Bi kursê ke çarçewaya polîtîkaya xizmetê zafziwanî yê Şaredarîya Şaristanê Girdî de ameyî bicaardene, yeno amanckerdene ke xizmetan de ke hemwelatîyan rê yenê pêşkêşkerdene, neseypêyîyê ziwanî kêmî bibê û têkilîyêka hîna xurte bêro ronayene.

 

Perwerdeyê kurmanckî û zazakî yenê dayene

 

Çarçewaya kursan de ke xizmetanê şaredarîye de xurtkerdişê nêzdîbîyayîşê zafziwanî esas gêno, perwerdeyê kurmanckî û kirmanckî yenê dayene. Bi nê perwerdeyan, yeno amanckerdene ke personelî hemwelatîyanê grûbanê ziwanî yê cîyayan reyde bi hewayêko hîna rasterast û tesîrdar têkilî ronê, resayîşê xizmetanê pêroyî de asanî bêra temînkerdene.

 

Kursî do hîrê aşmî dewam bikerê

 

Kursê ke do 3 aşmî dewam bikerê, Warê Cuya Hempare yê Sumerparkî û Salona Kombîyayîşê Meclîsî ya Şaredarîya Amedî ya Şaristanê Girdî de yenê dayene. Çarçewaya programanê dersî yê hewteyî de beşdarî hem do perwerdeyê ziwanî yê bingeyî bigîrê hem zî do îmkan bivînê ke qabîlîyetê xo yê wendiş-nuştişî aver berê. Bi xebata ke hetê Serekîya Daîreyanê Çimeyê Merdiman û Perwerdeyî ra yena ramitene, averberdişê qabîlîyetanê ziwanî yê personelanê şaredarîye ra teber, yeno amanckerdene ke resnayîşê ziwanan ê mîyanê neslan bêro piştîdayene, mîrasê kulturî bêro pawitene û modelê şaredarîya zafziwanîye warê dezgehkî de bêro xurtkerdene. Şaredarîya Şaristanê Girdî, bi nê tewir xebatan dewam kena ke hem piştî bido pawitişê zafrengîya ziwanî hem zî fehmê îdareyê herêmkî ke nasnameyê cîyayî û ziwanê cîyayî warê pêroyî de seypê û asaye benê, hîra bikero.